На лінію «102» звярнулася дачка 65-гадовай пенсіянеркі, якая стала ахвярай тэлефонных ашуканцаў. Пра гэта паведамляе тэлеграм-канал «Міліцыя Мінска».

Па словах намесніка начальніка Упраўлення крымінальнага вышуку ГУУС Мінска Андрэя Арлоўскага, сышчыкі ўстанавілі, што спачатку з мінчанкай у месенджары звязаліся невядомыя, якія прадставіліся супрацоўнікамі «Белтэлекама» і пад маркай падаўжэння дагавору выманілі пашпартныя дадзеныя. Падчас другога званка (ужо па мабільным тэлефоне) жанчыну ўпэўнілі, што ад яе імя зламыснікі праводзяць незаконныя фінансавыя аперацыі. Каб пазбегнуць адказнасці і захаваць зберажэнні, яна павінна задэклараваць усе наяўныя грошы, інакш яны будуць канфіскаваныя падчас вобыску як здабытыя злачынным шляхам.

Пацярпелая паверыла і аддала прыбыўшаму незнаёмцу, якога лічыла кур’ерам Нацыянальнага банка, каля 330 тысяч рублёў у эквіваленце. 

Гэтыя грошы збіралі некалькі пакаленняў яе сям’і.

Следчымі ўзбуджана крымінальная справа за махлярства.

Міліцыя нагадвае, што супрацоўнікі праваахоўных органаў, банкаўскіх і іншых устаноў не тэлефануюць грамадзянам у месенджарах. Калі невядомыя па тэлефоне патрабуюць здзейсніць якія-небудзь маніпуляцыі з фінансамі (задэклараваць, пакласці на бяспечны рахунак, аддаць кур’еру і г.д.) — трэба неадкладна спыніць размову і паведаміць пра гэта ў міліцыю.