Пажарнае дэпо ў райцэнтры пабудавалі яшчэ ў 1952 годзе, і яно эксплуатавалася да 2005 года, пасля чаго побач з’явілася двухпавярховая прыбудова, а будынак часткова мадэрнізавалі. У 2022 годзе кіраўніцтва Віцебскага абласнога ўпраўлення МНС вырашыла рэканструяваць ПАВЧ № 1. Будаўніча-мантажныя работы на аб’екце пачаліся ў лістападзе 2024 года.



Цяпер гэта сучасны будынак агульнай плошчай больш за 1,1 тыс. кв. м. У цэнтральнай частцы размяшчаюцца гараж-стаянка на 5 машына-месцаў для тэхнікі і адміністрацыйна-бытавы корпус. Таксама ў ПАВЧ маюцца добраўпарадкаваныя кабінеты для супрацоўнікаў аддзела, гараж-стаянка для легкавога транспарту. 

 

Асноўны акцэнт пры рэканструкцыі будынка быў зроблены на пастаноўку ў баявы разлік вышыннай тэхнікі, паколькі раней гаражы па габарытах не адпавядалі памерам сучасных аўталесвіц. Таксама пасля абнаўлення будынка палепшыліся санітарна-бытавыя ўмовы для асабістага складу падраздзялення. У новым будынку ёсць памяшканні для мыйкі, сушкі і захоўвання пажарных рукавоў, баявога адзення пажарных. Размяшчаюцца тут і трэнажорная зала, пакоі прыёму ежы, псіхалагічнай разгрузкі і адпачынку. На будаўніцтва аб’екта было выдаткавана больш за Br4 млн.

 

У цырымоніі адкрыцця абноўленай ПАВЧ прынялі ўдзел прадстаўнікі МНС, абласной і раённай улады, жыхары Шаркаўшчыны. «Гэта знамянальная падзея не толькі для нашага ведамства, але і для Віцебскага абласнога ўпраўлення МНС, гарадскога пасёлка Шаркаўшчына. Прыклад таго, што наша дзяржава, нягледзячы на складаныя эканамічныя ўмовы, знаходзіць магчымасць укладваць сродкі ў забеспячэнне бяспекі жыцця і здароўя грамадзян», — павіншаваў ратавальнікаў намеснік міністра па надзвычайных сітуацыях Сяргей Салановіч, падкрэсліўшы, што абноўленая ПАВЧ забяспечана неабходным абсталяваннем, патрэбнай тэхнікай, і тут створаны ўсе ўмовы для якаснага нясення службы работнікамі МНС.