Як адзначыў старшыня Федэрацыі прафсаюзаў Беларусі Юрый Сянько, правядзенне з’езда плануецца напярэдадні пасяджэння Усебеларускага народнага сходу, галоўнай тэмай якога стане праект Праграмы сацыяльна-эканамічнага развіцця краіны на 2026—2030 гады.

— Для распрацоўкі гэтага найважнейшага дакумента на рэспубліканскім узроўні была створана рабочая група. Прадстаўнікі прафсаюзаў таксама працавалі ў складзе гэтай групы і выказвалі свой пункт гледжання, уносілі прапановы. Работа праведзена вялікая. Базавую аснову дакумента мы падтрымліваем, — падкрэсліў лідар нацыянальнага прафцэнтра. — У прыватнасці, для нас важна, што на сёння ў праекце праграмы прадугледжваецца паэтапнае павелічэнне да 2030 года рэальных грашовых даходаў насельніцтва, рэальнай заработнай платы, узроўню забяспечанасці насельніцтва жыллём і павышэнне якасці інфраструктуры. Далейшае абмеркаванне праекта праграмы адбудзецца на пасяджэнні Усебеларускага народнага сходу. У сувязі з гэтым на з’ездзе нам неабходна яшчэ раз усім разам зірнуць на выбраныя прыярытэты, кірункі і задачы комплексна, з розных пунктаў гледжання, каб на Усебеларускім народным сходзе прадставіць сваю абгрунтаваную салідарную пазіцыю.

Удзельнікі з’езда — вышэйшага органа ФПБ — таксама вызначаць асноўныя прыярытэты работы прафсаюзаў на наступны год з улікам сучасных эканамічных выклікаў і выберуць новых дэлегатаў УНС ад прафсаюзаў замест раней выбыўшых.

Алена КРАВЕЦ.

Чытайце таксама: «Буравеснік» адзначае свой першы юбілей адкрытымі спаборніцтвамі па лёгкай атлетыцы