У святочных мерапрыемствах, прысвечаных Дню ведаў, прынялі ўдзел каля 600 студэнтаў, большая частка з іх — першакурснікі.

Павіншавалі маладых людзей з пачаткам навучальнага года ганаровыя госці — намеснік Кіраўніка Адміністрацыі Прэзідэнта Рэспублікі Беларусь Вольга Чупрыс, старшыня Федэрацыі прафсаюзаў Беларусі Юрый Сянько і член-карэспандэнт Нацыянальнай акадэміі навук Беларусі, доктар эканамічных навук, прафесар Міхаіл Мясніковіч.

Лідэр нацыянальнага прафцэнтра Юрый Сянько адзначыў, што 1 верасня — вельмі хвалюючая дата не толькі для моладзі, але і для кожнага жыхара нашай краіны.

— Наш прафсаюзны ўніверсітэт — гэта буйная навучальная ўстанова. Мы рыхтуем кадры ў розных сферах, каб будучыя спецыялісты, якія выйдуць на рынак працы, былі запатрабаваны ў нашай краіне. Студэнты матываваныя, яны ўсведамляюць, куды прыйшлі вучыцца, — падкрэсліў старшыня ФПБ. — Сёння ў Мінску і ў нашых філіялах — Гомелі і Віцебску — у аўдыторыях за парты селі 780 першакурснікаў. Перакананы, што да канца навучання яны дасканала авалодаюць прафесіяй, стануць адзінай камандай, уславяць і свае прадпрыемствы, і сваю краіну. Мы зробім усё, каб так і было.

Звяртаючыся да першакурснікаў, Юрый Сянько падкрэсліў, што момант паступлення ва ўніверсітэт — адзін з самых важных у жыцці, і гэтыя хвіліны многія з прысутных на лінейцы будуць з цеплынёй успамінаць праз доўгія гады.

— Вучыцеся, атрымлівайце веды, сябруйце, любіце сваю краіну, свой універсітэт, падтрымлівайце сваіх выкладчыкаў, — даў наказ студэнтам старшыня ФПБ.

Традыцыйна на ўрачыстай лінейцы адбылося пасвячэнне ў першакурснікі, а таксама ўзнагароджанне самых актыўных студэнтаў, якія праявілі сябе ў розных кірунках. Гэта тыя маладыя людзі, якія паказалі ўжо высокія вынікі ў вучобе, паспяхова рэалізавалі сябе ў навукова-даследчай, грамадскай і спартыўнай рабоце.

Яшчэ адна традыцыя прафсаюзнай ВНУ — кожны год адкрываць новыя напрамкі і пашыраць магчымасці атрымання дадатковых навыкаў і кампетэнцый. Падарунак да гэтага навучальнага года — адкрыццё сучаснай аўташколы. Праект рэалізаваны Міжнародным універсітэтам «МІПСА» пры падтрымцы Федэрацыі прафсаюзаў Беларусі.

• Як адзначыў рэктар прафсаюзнага ўніверсітэта Уладзімір Пазнякоў, патэнцыйныя курсанты — студэнты ВНУ. Гэта дазволіць рыхтаваць спецыялістаў з дадатковымі кампетэнцыямі, якія могуць спатрэбіцца ў іх працоўнай дзейнасці. Акрамя таго, цяпер у маладых людзей ёсць магчымасць прайсці падрыхтоўку, практычна не адрываючыся ад асноўнай вучобы, сумяшчаць атрыманне вадзіцельскага пасведчання з навучаннем па асноўнай спецыяльнасці.

Так, аўташкола накіравана на падрыхтоўку вадзіцеляў катэгорыі «В». Тэорыя, практыка, навыкі бяспечнага і ўпэўненага ваджэння на ажыўленых дарогах сталіцы — праграма навучання насычаная. Ёсць і адметная асаблівасць — будучыя вадзіцелі змогуць атрымаць першасныя навыкі кіравання ў тым ліку і на ўнікальным аўтатрэнажоры з элементамі віртуальнай рэальнасці.

Трэба адзначыць, што ўніверсітэт пастаянна ўдасканальвае адукацыйны працэс, пашырае магчымасці для атрымання дадатковых навыкаў і ведаў. Напрыклад, сёння паспяхова працуюць цэнтры сацыялагічных даследаванняў, кітайскай мовы і культуры, крыміналістычны палігон, вучэбна-практычная лабараторыя сучасных ідэнтыфікацыйных тэхналогій і інш. Усё гэта накіравана на тое, каб даць магчымасць кожнаму развівацца і кожны дзень даведвацца нешта новае.

Міжнародны ўніверсітэт «МІПСА», заснаваны Федэрацыяй прафсаюзаў Беларусі, — сучасная ВНУ, якая дынамічна развіваецца і ажыццяўляе падрыхтоўку спецыялістаў у галіне эканомікі, кіравання, права, інфармацыйных тэхналогій і лінгвістыкі. Сёння ў ім навучаюцца каля 5000 студэнтаў.

Алена КРАВЕЦ