«У Год добраўпарадкавання амбіцыйныя задачы ставіліся перад будаўнічай галіной. Прыемна прызнаваць станоўчыя вынікі праведзенай работы. Значна перавыкананы паказчык выканання праграмы па жыллёвым будаўніцтве і абнаўленні сацыяльнай інфраструктуры. Пры плане 6, 6 тыс. кв.м жылля мы здалі 6, 9 тыс. кв. м», — сказаў Сяргей Чэпік.

Старшыня райвыканкама праінфармаваў аб планах па будаўніцтве жылля. У прыватнасці, у мікрараёне Юбілейны запланавана будаўніцтва і ўвод у эксплуатацыю 60-кватэрнага жылога дома. У раёне вуліцы Кірава пачынаецца рэалізацыя праекта індывідуальнай жылой забудовы. Таксама з боку вуліцы Юбілейнай ідуць работы па стварэнні інфраструктуры для новага мікрараёна. Там жа будуецца новы гандлёвы цэнтр. У перспектыве чакаецца будаўніцтва 40-кватэрнага арэнднага дома па вуліцы Зялёнай і 12-кватэрнага ў аграгарадку Навасёлкі.

Пачаў працу новы корпус бальніцы — адзін з самых значных і важных для здароўя жыхароў аб’ектаў. Яго кошт склаў каля 13 млн бел. руб. 

Для аховы здароўя раёна 2025 год стаў годам значных пераўтварэнняў, адзначыў старшыня райвыканкама. Новы будынак стацыянара Пастаўскай ЦРБ, які адкрыў свае дзверы, абсталяваны сучаснымі УГД і эндаскапічнымі кабінетамі.

«Абнаўленне медыцынскага абсталявання, рамонт памяшканняў, усталёўка і ўкараненне сучаснай інфармацыйнай сістэмы значна палягчае працу медыцынскіх работнікаў і павышае якасць аказваемай медыцынскай дапамогі. Без малога 1 млн бел. руб. затрачана на бягучы і капітальны рамонты, больш за паўмільёна — на набыццё неабходнага медыцынскага абсталявання», — дадаў Сяргей Чэпік. 

Паводле яго слоў, мадэрнізацыя ў галіне працягнецца і ў новым годзе. Ужо зараз ідуць неабходныя падрыхтоўчыя працы для ўстаноўкі мамографа.

Пры падтрымцы Беларускай федэрацыі футбола змяніўся пасля рэканструкцыі гарадскі стадыён, на якім зараз ёсць сучаснае футбольнае поле са штучным пакрыццём. Абсталяваны сучасны скейт-парк, які ўжо стаў месцам прыцягнення для моладзі. 

Прыкметна абнавілася дарожная сетка. Праведзены капітальны рамонт адразу двух мастоў — праз раку Палавіца і раку Мядзелка. Праведзена вялікая работа па добраўпарадкаванні гарадскіх вуліц да фестывалю «Вытокі». Прыведзена ў парадак вулічная сетка ў гарадскім пасёлку Лынтупы. Вядзецца капітальны рамонт моста праз раку Мядзелка на вуліцы Чырвонаармейскай. 

Адной з важных кропак прыросту эканомікі ў 2025 годзе стаў турызм. На тэрыторыі Пастаўскага раёна рэалізуюцца мерапрыемствы падпраграмы «Паазер’е».

«Да ліку турыстычных брэндаў раёна ўжо можна дадаць спартыўна-турыстычны комплекс „Азёры“ з яго магчымасцямі для размяшчэння, правядзення спартыўных мерапрыемстваў і культурна-забаўляльных праектаў. У бліжэйшай перспектыве будаўніцтва фізкультурна — аздараўленчага комплексу абласнога дзіцячага рэабілітацыйнага цэнтра „Ветразь“, некалькіх прыватных турыстычных комплексаў, далейшае развіццё сеткі аграэкасядзіб», — адзначыў Сяргей Чэпік.

Дзякуючы прасоўванню турыстычных паслуг на рэспубліканскім і міжнародным узроўнях за мінулы год Пастаўскі раён наведалі больш за 30 тыс. турыстаў.