Работа па наладжванні ўзаемадзеяння Беларусі з Бразіліяй вядзецца комплексна. Аб гэтым заявіў Надзвычайны і Паўнамоцны Пасол Рэспублікі Беларусь у Федэратыўнай Рэспубліцы Бразілія і па сумяшчальніцтве ў Рэспубліцы Парагвай і Усходняй Рэспубліцы Уругвай Андрэй Андрэеў, паведамляе БелТА.
Паводле слоў Андрэя Андрэева, семінар — гэта зверка гадзіннікаў, падвядзенне вынікаў работы па выкананні задач на гандлёва-эканамічным напрамку і пастаноўка новых задач. «Па выніках семінара плануем выбудоўваць работу кропкава, канкрэтна па тых напрамках, праектах, якія будуць разгледжаны дэталёва ў час рабочых сустрэч з кіраўніцтвам міністэрстваў, канцэрнаў і асобных прадпрыемстваў. Таму такі фармат з’яўляецца неабходным для тактычнага і стратэгічнага карэкціравання дыпламатычнай дзейнасці загранустаноў з акцэнтам на гандлёва-эканамічным складніку», — падкрэсліў ён.
Кіраўнік дыпмісіі звярнуў увагу, што задача пасольства — прадаўжаць на аснове ўжо дасягнутых вынікаў развіваць супрацоўніцтва па розных напрамках. Ён падзяліўся, што за мінулыя паўгода былі арганізаваны візіты чатырох беларускіх дэлегацый у Бразілію. «Дасягнуты дамоўленасці па пашырэнні парламенцкага супрацоўніцтва па лініі абедзвюх палат. Былі ажыццёўлены сустрэчы на палітычным узроўні. Падпісана пагадненне паміж БРСМ і Саюзам моладзі Бразіліі. Усе дамоўленасці, якія былі дасягнуты, у сваёй аснове маюць гандлёва-эканамічны складнік», — дадаў ён.
Паводле яго слоў, у хуткім часе чакаецца візіт дэлегацыі Бразіліі ў Мінск. «Працуем над арганізацыяй візіту ў верасні ў Мінск кіраўніцтва сталіцы Бразіліі, у тым ліку па лініі дзелавых колаў, для правядзення прадметных перагавораў аб гандлёва-эканамічным супрацоўніцтве, а таксама заключэння пагаднення аб пабрацімскіх сувязях», — сказаў дыпламат.
Пасол звярнуў увагу на важнасць таго, што Бразілія ў гэтым годзе старшынствуе ў БРІКС. Беларускія дэлегацыі ўдзельнічалі ў мерапрыемствах па лініі БРІКС. «Нашы падыходы па лініі шматбаковага супрацоўніцтва шмат у чым супадаюць з падыходамі краін Глабальнага Поўдня, — удакладніў ён. — У Беларусі і Бразіліі шмат сумесных пунктаў гледжання на глабальныя пытанні захавання міру, устойлівага развіцця, сацыяльна-эканамічнага развіцця нашых краін».
Дыпламат таксама дадаў, што ўсе двухбаковыя праекты накіраваны перш за ўсё на рост сацыяльна-эканамічнага развіцця абедзвюх краін. «Бразілія — буйнейшая краіна, сусветны лідар, у яе вялікі эканамічны патэнцыял, і наша задача — выбудоўваць адпаведны трэк з гэтай краінай, перш за ўсё ў напрамку ўстойлівага ўзаемадапаўняльнага, узаемавыгаднага супрацоўніцтва па многіх напрамках», — рэзюмаваў пасол.
