Старшыня Савета Рэспублікі Наталля КАЧАНАВА знаходзілася з рабочай паездкай у Докшыцкім раёне, дзе праінспектавала шэраг сельскагаспадарчых прадпрыемстваў. Старшыня Палаты прадстаўнікоў Ігар СЕРГЯЕНКА наведваў Браслаўскі раён: ён прыняў удзел у адкрыцці новага аддзялення Браслаўскай цэнтральнай раённай бальніцы, сустрэўся з маладымі спецыялістамі раёна, азнаёміўся з работай малочнатаварнага комплексу сельскагаспадарчага вытворчага кааператыва. 

Наведваючы адно з самых моцных сельгаспрадпрыемстваў Докшыцкага раёна — ААТ «Бягомльскае», Наталля Качанава вывучыла ўмовы працы работнікаў, утрымання жывёл, а таксама матэрыяльна-тэхнічнае абсталяванне малочнатаварнага комплексу «Бягомль» і малочнатаварнай фермы «Добрунь».

Пабывала Старшыня Савета Рэспублікі і на прадпрыемстве ААТ «Барсучанка», да якога ёсць пытанні. На механізаваным двары спікер азнаёмілася са станам сельгастэхнікі, наведала малочнатаварную ферму, ацаніла ўмовы ўтрымання цялят.

Падчас знаходжання ў ААТ «Таргуны» ў цэнтры ўвагі Наталлі Качанавай былі механізаваны двор і малочнатаварная ферма. У вядзенні гаспадаркі — больш за 14 тысяч гектараў сельскагаспадарчых угоддзяў. Асноўная вытворчая спецыялізацыя — вытворчасць малака. ААТ «Таргуны» з’яўляецца сыравіннай зонай для ААТ «Тураўскі малочны камбінат». Планавая мадэрнізацыя жывёлагадоўчых аб’ектаў, абнаўленне абсталявання дазваляюць гаспадарцы павялічваць аб’ёмы вытворчасці жывёлагадоўчай прадукцыі, паляпшаюць яе якасць. Для правядзення палявых работ ёсць неабходная тэхніка.

У рамках рабочай паездкі ў Браслаўскі раён Старшыня Палаты прадстаўнікоў, упаўнаважаны прадстаўнік кіраўніка дзяржавы ў Віцебскай вобласці Ігар Сергяенка наведаў малочнатаварны комплекс «Опса» сельскагаспадарчага вытворчага кааператыва «Маяк Браслаўскі». Шмат гадоў сельскагаспадарчы вытворчы кааператыў задае курс развіццю аграрнага сектара ўсяго раёна. Гэта прадпрыемства з багатай гісторыяй, магутным жывёлагадоўчым комплексам і тысячамі гектараў урадлівай зямлі. Сёлетні год стаў для кааператыва сапраўднай праверкай на трываласць, якую ён з гонарам вытрымаў дзякуючы самаадданай працы калектыву.

«Пытанні дысцыпліны ў гэтай сферы вельмі важныя. І ў вялікіх, і ў невялікіх арганізацыях шмат залежыць ад асобы кіраўніка, ад таго, які ён тэмп задае, якую дысцыпліну патрабуе. Часам у нас бываюць факты безгаспадарлівасці не з боку кіруючага складу, хоць такое таксама ёсць, а непасрэдна работнікаў. Зламаўся трактар ці стаіць барана трое сутак на полі — няхай стаіць. Таму, канешне, меры прымаць трэба, і меры прымаюцца. Для кіраўнікоў вялікіх намаганняў каштуе падтрыманне дысцыпліны і навядзенне парадку. Там, дзе пастаянна працуюць у тонусе, там парадак», — падкрэсліў Ігар Сергяенка.

Новае структурнае падраздзяленне Браслаўскай цэнтральнай раённай бальніцы, у адкрыцці якога прыняў удзел спікер Палаты прадстаўнікоў, — цэнтральнае стэрылізацыйнае аддзяленне. Яно дазволіць зэканоміць рэсурсы і павысіць надзейнасць стэрылізацыйных мерапрыемстваў, паколькі ўсе этапы выконваюцца ў адным месцы з выкарыстаннем спецыялізаванага абсталявання. У выніку медперсанал вызваліцца ад неабходнасці займацца стэрылізацыяй, што дасць магчымасць засяродзіцца на лячэнні пацыентаў.

Паводле прэс-службаў Савета Рэспублікі і Палаты прадстаўнікоў.