Па даных Нацыянальнага статыстычнага камітэта, колькасць суб’ектаў малога і сярэдняга прадпрымальніцтва за 2024 год перавышае 366 тыс. З гэтай колькасці 128 тыс. — юрыдычныя асобы. «Удзельная вага сярэдняй колькасці работнікаў, якія працуюць у суб’ектаў малога і сярэдняга прадпрымальніцтва, складае 35,8 %. Удзельная вага МСП у ВУП краіны — больш за чвэрць. Суб’ектамі МСП забяспечваецца досыць высокая доля ва ўсіх паказчыках сацыяльна-эканамічнага развіцця», — адзначыла Вольга Русіновіч. 

Што датычыцца гендарнага становішча ў эканоміцы, прадпрымальніцкую дзейнасць у Беларусі ажыццяўляе больш за 80 тыс. жанчын. «Гэта амаль 40 % усёй прадпрымальніцкай супольнасці. Традыцыйна, як і ў большасці краін, прадпрымальніцы выбіраюць сферы, якія дазваляюць рэалізаваць свой творчы патэнцыял. Гэта кансалтынг, рэклама, маркетынг, індустрыя прыгажосці, дызайн інтэр’еру і пашыў адзення. У цэлым у нас 85 % жанчын-прадпрымальнікаў працуюць у сферы паслуг», — звярнула ўвагу дырэктар Дэпартамента па прадпрымальніцтве.

На яе думку, апошнім часам намецілася станоўчая дынаміка ў развіцці жаночага прадпрымальніцтва ў спрадвечна мужчынскіх галінах: IT-сферы, грузаперавозках, прамысловай вытворчасці.

«Абапіраючыся на афіцыйныя лічбы Белстата, падзялюся партрэтам сярэднестатыстычнай жанчыны-прадпрымальніка. Гэта гараджанка з вышэйшай адукацыяй ва ўзросце ад 30 да 44 гадоў, замужняя, выхоўвае адно дзіця, знайшла самарэалізацыю ў сферы паслуг, — дадала Вольга Русіновіч. — У Беларусі пражывае каля 4 млн жанчын. Гэта 55 % ад колькасці ўсяго насельніцтва. Жанчын у нас крыху больш. Узровень іх занятасці ў працаздольным узросце амаль 85 % і сярэдні ўзрост занятых жанчын 42 гады. Цудоўны пол займае палову ўсіх кіруючых пасад у краіне, гэта значыць у прынцыпе захоўваецца гендарная роўнасць. Кожны другі кіраўнік у нас — жанчына».