Крупскі раённы аддзел Следчага камітэта расследуе крымінальную справу аб серыі падпалаў, якія адбыліся ў адным з населеных пунктаў раёна. Паводле звестак следства, у маі ў Крупскі РАНС паступілі паведамленні аб пажарах у некалькіх будынках у пасёлку Бобр. Агнём былі пашкоджаныя гаспадарчыя пабудовы, а таксама жылы дом. Ва ўсіх выпадках ачаг узгарання знаходзіўся з вонкавага боку будынкаў, што сведчыла аб занесенай крыніцы ўзгарання — падпале.

Дзякуючы зладжанай і аператыўнай рабоце праваахоўнікаў падпальшчыка ўдалося ўстанавіць і затрымаць. Ім аказаўся 17-гадовы мясцовы жыхар. Падлетак сваю віну ў зробленым цалкам прызнаў і расказаў следчым, што ўчыняў падпалы з-за нуды: хацеў паглядзець на працу пажарных.

Вывучэнне асобы непаўналетняга паказала, што ён знаходзіцца на ўліку ў інспекцыі па справах непаўналетніх Крупскага РАУС. Са снежня мінулага года сям’я прызнана той, якая знаходзіцца ў сацыяльна небяспечным становішчы, так як падлетак злоўжывае спіртнымі напоямі, курыць і раней неаднаразова трапляў у поле зроку супрацоўнікаў міліцыі. Таксама ў дачыненні да яго распачатая крымінальная справа аб хуліганстве — ён пашкодзіў дах у краме.

У цяперашні час праводзяцца неабходныя следчыя дзеянні і аператыўна-вышуковыя мерапрыемствы, накіраваныя на ўстанаўленне нанесенай шкоды, усіх абставін таго, што адбылося, а таксама магчымай датычнасці затрыманага да іншых аналагічных злачынстваў на тэрыторыі раёна.

Следчыя кваліфікавалі дзеянні падлетка па ч. 2 арт. 218 (наўмыснае пашкоджанне маёмасці, здзейсненае агульнанебяспечным спосабам), ч. 1 арт. 339 (хуліганства) Крымінальнага кодэкса Рэспублікі Беларусь і злучылі крымінальныя справы ў адну вытворчасць. З санкцыі пракурора да яго прыменена мера стрымання ў выглядзе заключэння пад варту. Расследаванне крымінальнай справы працягваецца.