Адвакат, загадчык юрыдычнай кансультацыі Добрушскага раёна Вікторыя Раманчыкава:

Аднаго факту недахопу плошчы недастаткова

Як патлумачыла спецыяліст, грамадзяне могуць быць пастаўлены на ўлік маючых патрэбу ў паляпшэнні жыллёвых умоў толькі пры наяўнасці падстаў, прадугледжаных артыкулам 36 Жыллёвага кодэкса Рэспублікі Беларусь.

Пры гэтым існуюць абставіны, калі нават пры наяўнасці падстаў для паляпшэння жыллёвых умоў чалавека не паставяць на ўлік. Гэтыя выпадкі вызначаны артыкулам 37 ЖК.

Пасля льготнага крэдыту прыйдзецца чакаць пяць гадоў

Адным з такіх абмежаванняў з’яўляецца выкарыстанне дзяржаўнай падтрымкі пры будаўніцтве або куплі жылля.

Так, на ўлік не прымаюцца грамадзяне, якія скарысталіся льготным крэдытам, аднаразовай субсідыяй на будаўніцтва (рэканструкцыю) або набыццё жылля, а таксама іншымі відамі дзяржаўнай падтрымкі, на працягу пяці гадоў з даты дзяржаўнай рэгістрацыі права ўласнасці на пабудаванае або набытае жылое памяшканне.

Гэта правіла дзейнічае і ў тым выпадку, калі плошча кватэры менш за ўстаноўленую норму на аднаго чалавека.

Ёсць выключэнні для некаторых сем’яў

Як адзначыла адвакат, абмежаванне не прымяняецца ў асобных выпадках. Напрыклад, калі пасля атрымання жылля павялічыўся склад сям’і ў сувязі з нараджэннем, усынаўленнем або удачарэннем дзяцей.

Таксама выключэнне прадугледжана для вайскоўцаў, якія пераехалі з іншага населенага пункта ў сувязі з прызначэннем на пасаду.

Калі можна зноў стаць на ўлік

Калі сям’я не адносіцца да ўказаных выключэнняў, паўторна звярнуцца для пастаноўкі на ўлік маючых патрэбу ў паляпшэнні жыллёвых умоў можна будзе толькі праз пяць гадоў з дня дзяржаўнай рэгістрацыі права на жылое памяшканне.