Першы этап прадугледжваў работу авіяцыі. Пара самалётаў Як-130 нанесла ўдары па цэлях, якія імітуюць браніраваную калону ўмоўнага праціўніка на маршы. «Па цэлі парай самалётаў быў нанесены ўдар некіравальнымі ракетамі, гарматным узбраеннем. У адпаведнасці з тымі нарматывамі, якія закладзены ў курс стральбы, цэль паражоная. Мы бачым варонкі суцэльныя, ёсць прамое паражэнне па бронеаб’ектах. Гэта сведчыць аб прафесіяналізме і падрыхтоўцы нашых лётчыкаў», — сказаў Аляксандр Вальфовіч.

Затым баявыя верталёты Мі-35 нанеслі ўдары па цэлі. У тым раёне былі размешчаны мішэні, прывязаныя да асабовага складу ўмоўнага праціўніка, які знаходзіцца ў сховішчах. Спецыялісты засталіся задаволеныя работай вайскоўцаў. 

Таксама мішэні, якія імітуюць парушальнікаў паветранай прасторы, паразілі ракетныя зенітныя комплексы «Аса». Вайскоўцы 62-га зенітнага ракетнага палка атрымалі каманду на пошук цэляў, выявілі іх, накіравалі на суправаджэнне, ажыццявілі пуск ракет. 

Па словах намесніка начальніка разліку Ягора Хахаліна, усё гэта займае лічаныя секунды, таму хваляванне суседнічае з лімітавай засяроджанасцю. «І адрэналін зашкальвае, і адказнасць вялікая. На ўсю работу — ад выяўлення цэлі да пуску ракеты і яе паражэння — сышло прыблізна 35 секунд. У нас разлік складаецца з пяці чалавек. Зыходзячы з каманд, якія падае начальнік разліку, мы дзейнічаем. Усё даволі ўзгоднена. Калі памыліцца адзін з нас, астатнія не змогуць нічога зрабіць», — расказаў вайсковец. 

Дзяржаўны сакратар Савета Бяспекі акцэнтаваў увагу, што для праверкі боегатоўнасці ВПС і войскаў СПА прадугледжаны шырокі комплекс мерапрыемстваў.