«У гэтым сезоне 21-22 сакавіка на сцэну вяртаецца легендарная опера „Набука“ ў пастаноўцы знакамітага італьянскага рэжысёра Джанкарла дэль Манака. Ужо актыўна ідуць рэпетыцыі, інтэнсіўнасць проста неймаверная», — сказала Кацярына Дулава.

На беларускай сцэне ўпершыню опера загучала ў 1999-м, пазней — у 2010-м. Апошні раз на сцэне тэатра гэта опера ставілася ў 2016-м. У 2021 годзе канцэртна-сцэнічная версія адкрыла вечары Вялікага тэатра ў замку Радзівілаў.

«Цяпер ідуць рэпетыцыі на малой сцэне. За пяць дзён да прэм’еры мы выйдзем на асноўную сцэну, прыедзе маэстра і будзе ўжо канчаткова дашліфоўваць сваю канцэпцыю. А пакуль з яго задумамі працуе рэжысёр Георгій Шылаў і аўтар касцюмаў і сцэнаграфіі Франчэска Банаці», — дадала Кацярына Дулава.

Джанкарла дэль Манака — сын вялікага тэнара XX стагоддзя Марыа дэль Манака. За сваю доўгую кар’еру (яму 82 гады) ён паставіў больш за сотню опер у буйнейшых тэатрах свету і прадаўжае актыўна працаваць: у Вялікім тэатры Расіі ў 2024-м ён паставіў «Рыгалета» Дж.Вердзі, у 2025-м — оперу «Аіда» Дж.Вердзі ў Марыінскім тэатры.

«Мы працуем над спектаклямі, прысвечанымі нацыянальнай тэматыцы. Да лістапада плануем прадставіць балет пра Марка Шагала ў пастаноўцы галоўнага балетмайстра Вялікага тэатра Беларусі Ігара Колба. Твор незвычайны па прачытанні, падыходах. Не магу сказаць, што гэта біяграфічная гісторыя. У цэнтры будзе ідэя сталення асобы і таго, як на жыццё чалавека ўплывае месца, дзе ён нарадзіўся, што бачыў, чуў, з чым жыў. На сцэне будзе прадстаўлена ідэя прагулак і палётаў, якія важны ў творчасці Шагала», — дадала Кацярына Дулава.

Паводле яе слоў, другім спектаклем стане балет-опера, прысвечаны полацкім князям. Тэатр прадставіць гісторыю аб гераічных людзях, свяціцелях, духоўных асобах, інтрыгах, разбурэнні і стварэнні. Пакуль стаіць пытанне, на якой мове будуць ставіць гэты твор. Мова павінна быць у стылі «Слова пра паход Ігаравы», сказанняў, звязаных з бітвай на Нямізе, гэта значыць былінна-агульнаславянскай, дзе будуць сустракацца словы, якія ўжывалі ў той час. Таму цяпер тэатр працуе з гісторыкамі — людзьмі, якія могуць пацвердзіць ступень дакладнасці характараў або падзей. Не выключаецца магчымасць супрацоўніцтва з Інстытутам гісторыі Нацыянальнай акадэміі навук і археолагамі.

Кацярына Дулава падкрэсліла, што гэта пастаноўка стане візітнай карткай музея, як казачныя эпасы, якія прадстаўляюць тэатры з усходніх краін, а таксама расказала аб структуры пастаноўкі: «Першая і трэцяя дзеі — опера, а другая — балет, прысвечаны Усяславу Брачыславічу. Першую дзею прысвяцім Полацку, Рагнедзе з Уладзімірам. Трэцюю — Ефрасінні Полацкай». Пастаноўку плануюць прадставіць да канца 2027 года.

На адкрыцці фестывалю «Балетнае лета», які пройдзе 6 і 7 чэрвеня, пакажуць спектакль «Баядэрка». У пастаноўкі будзе новае аблічча, яна будзе па-новаму размалявана, але агульнае ўяўленне не будзе разбурана. Галоўны балетмайстар тэатра Ігар Колб прапануе сваё бачанне гэтага твора.

«Рыхтуем оперу „Шукальнікі жэмчугу“. Мастацкі савет ужо зацвердзіў канцэпцыю. Будзе акадэмічная пастаноўка — касцюмная, яркая. Ставіць яе каманда Вялікага тэатра: галоўны рэжысёр Ганна Маторная, дырыжор-пастаноўшчык Арцём Макараў і мастак-пастаноўшчык Любоў Сідзельнікава», — падкрэсліла генеральны дырэктар Вялікага тэатра Беларусі. Прэм’еру абяцаюць паказаць і на Мінскім міжнародным Калядным оперным форуме.

Акрамя таго, ідзе работа над творам «Італьянка ў Алжыры», ставіць які будуць сучасныя рэжысёры. «Пакуль раскрываць усе тайны не буду, але гэта павінна быць весела і смешна», — рэзюмавала Кацярына Дулава.