Урачыстая цырымонія старту 15-га сезона Рэспубліканскага маладзёжнага праекта «100 ідэй для Беларусі» пройдзе ў Нацыянальнай акадэміі навук. Падчас цырымоніі арганізатары абвесцяць аб пачатку прыёму заявак для ўдзелу ў конкурсе.

«Удзельнікамі мерапрыемства стануць маладыя навукоўцы, прадстаўнікі найбуйнейшых устаноў вышэйшай адукацыі краіны, навукова-даследчых інстытутаў і цэнтраў, а таксама арганізатары праекта. Перад пачаткам мерапрыемства яны змогуць азнаёміцца з пастаянна дзеючай выставай «Дасягненні айчыннай навукі — вытворчасці», на якой прэзентаваны апошнія распрацоўкі беларускіх навукоўцаў. Затым адбудзецца фарсайт-дыскусія «Моладзь Беларусі: Навука і інавацыі», — расказалі ў прэс-службе.

Да 20 лістапада будзе адкрыты прыём заявак для патэнцыяльных удзельнікаў конкурсу. Імі могуць стаць маладыя людзі (калектыў аўтараў да трох чалавек) ва ўзросце ад 14 да 31 года і маладыя навукоўцы (устаноў вышэйшай адукацыі, арганізацый, падпарадкаваных НАН Беларусі, занятыя ў выкананні навуковых даследаванняў) да дасягнення імі наступнага ўзросту: доктар навук — да 40 гадоў, кандыдат навук, супрацоўнік без ступені, які атрымаў вышэйшую адукацыю, аспірант, магістрант — да 35 гадоў.

«Новы сезон праекта будзе рэалізоўвацца ў чатыры туры: першы — інфармацыйны (да 20 лістапада 2025 года), другі — адборачны (адбор заявак, навучальныя стартапы, раённыя і занальныя адборы (да 20 снежня), трэці — прадугледжвае арганізацыю абласных, Мінскай гарадской выстаў-прэзентацый, а таксама НАН Беларусі і Міністэрства адукацыі (да 31 студзеня 2026 года), чацвёрты — рэспубліканскі фінал (да 30 красавіка 2026 года)», — удакладнілі ў прэс-службе.

У 15-м сезоне праекта выдзелены тры ўзроставыя групы ўдзельнікаў, экспертны савет будзе выбіраць з ліку навучэнцаў устаноў агульнай сярэдняй, прафесійна-тэхнічнай і сярэдняй спецыяльнай адукацыі; студэнтаў, курсантаў; працоўнай моладзі, маладых навукоўцаў, прадстаўнікоў устаноў, арганізацый, падпарадкаваных НАН Беларусі па тры пераможцы ў кожнай з дзесяці намінацый («Энергетыка, у тым ліку атамная энергетыка, і энергаэфектыўнасць», «Аграпрамысловыя тэхналогіі і фермерства», «Прамысловыя і будаўнічыя тэхналогіі», «Ахова здароўя (медыцынскія тэхналогіі, фармацыя, бія- і нанаіндустрыя)», «Хімічныя тэхналогіі, нафтахімія», «Інфармацыйна-камунікацыйныя тэхналогіі (у тым ліку інтэлектуальныя сістэмы і аўтаматызацыя, разумныя гарады і экаўстойлівасць, лічбавая медыцына, інфармацыйныя тэхналогіі ў адукацыі, тэхналогіі па сацыяльнай інклюзіі, лічбавая этыка і кібербяспека)», «Экалогія (захаванне і аднаўленне прыроднага асяроддзя, рацыянальнае (устойлівае) выкарыстанне прыродных рэсурсаў і іх узнаўленне, прадухіленне шкоднага ўздзеяння на навакольнае асяроддзе)», «Нацыянальная бяспека і абарона ад надзвычайных сітуацый», «Грамадства і сацыяльная сфера», «Найлепшая бізнес-ідэя»).

БРСМ упершыню абвясціў пра старт рэспубліканскага маладзёжнага конкурсу «100 ідэй для Беларусі» ў верасні 2011 года. За гэтыя гады праект не толькі здабыў надзейных партнёраў, але і стаў брэндам саюза моладзі, які папулярызуе навуку, фарміруе імідж вучонага як паспяховага чалавека. Арганізатарамі 15-га сезона праекта выступаюць Беларускі рэспубліканскі саюз моладзі, Міністэрства адукацыі, Дзяржаўны камітэт па навуцы і тэхналогіях, Нацыянальная акадэмія навук.