Снежаньскія дні напоўнены для дзяцей чаканнем цудаў, і дарослыя імкнуцца ўдзяліць увагу кожнаму дзіцяці. «Мы намецілі для сябе шэраг сустрэч з хлопчыкамі і дзяўчаткамі. На асаблівым кантролі былі пытанні, звязаныя з дзецьмі, якія знаходзяцца ў медыцынскіх установах і не могуць сустрэць Новы год у коле сваёй сям’і. Пастараліся зрабіць як мага больш у гэтым кірунку. Я выбраў для наведвання «Тонус». Мы былі тут летась, давалі абяцанні замест Дзеда Мароза — усе іх выканалі. У рэабілітацыі мае патрэбу вялікая колькасць дзяцей. Вельмі важна гэтую працу праводзіць з ранняга ўзросту», — падкрэсліў Пётр Пархомчык.

Прынята рашэнне аб будаўніцтве лячэбна-рэабілітацыйнага корпуса. «Магчымасці цэнтра трэба павялічыць хоць бы на 40-45 %. Цяпер вядуцца праектныя работы. Завершым іх у студзені. З 2026 года будзе будоўля, пастараемся ў самы кароткі час, каб палепшыць магчымасці для нашых дзяцей», — сказаў старшыня аблвыканкама. У новым корпусе маюць намер размясціць кабінеты для карэкцыйнай педагогікі, лячэбнай фізкультуры, фізіятэрапеўтычны блок. Таксама там будуць уладкаваны пакоі для пражывання, паколькі месцаў у існуючым спальным корпусе недастаткова.

Для маленькіх пацыентаў «Тонусу» сёння наладзілі вялікае свята каля навагодняй ёлкі. Натуральна, госці прыехалі не з пустымі рукамі. Дзецям перадалі чырванабокія яблыкі, вырашчаныя фермерамі Брэсцкай вобласці. Цэнтру медыцынскай рэабілітацыі перадалі сертыфікаты на апарат для актыўна-пасіўнай механатэрапіі і тэрмашафу. Гэта падарункі Брэсцкага аблвыканкама і кампаній паўднёва-заходняга рэгіёна.

«У нас будзе спецыяльны рабатызаваны веласіпед. Ён патрэбен, каб трэніраваць у дзяцей хадзьбу. Таксама з’явіцца тэрмашафа. Цеплалячэнне вельмі папулярная працэдура, неабходная. Часта карыстаемся ёй. Каб парафін не астываў, яго трэба захоўваць у спецыяльнай шафе», — растлумачыў галоўны ўрач Брэсцкага абласнога цэнтра медыцынскай рэабілітацыі для дзяцей з псіханеўралагічнымі захворваннямі «Тонус» Андрэй Багдановіч. Акрамя таго, сёлета за кошт спонсарскай дапамогі і Брэсцкага аблвыканкама ва ўстанове аховы здароўя пабудавалі спецыяльную спартыўную пляцоўку для лячэбнай фізкультуры, палепшылі ўмовы ў спальным корпусе.

Рэабілітацыю ў «Тонусе» штогод праходзяць каля 1,5 тыс. дзяцей з Брэсцкай вобласці і іншых рэгіёнаў Беларусі. Дапамогу спецыялістаў атрымліваюць дзеці, якія маюць праблемы з цэнтральнай нервовай сістэмай, якія спалучаюцца з парушэннямі апорна-рухальнага апарату, разумовага і маўленчага развіцця, слыху і зроку.