Біялагічны аб’ект «Старажытныя дубы Багушэўскага лясгаса» аб’яўлены батанічным помнікам прыроды мясцовага значэння. Райвыканкам даручыў устанавіць межы, плошчу, спіс землекарыстальнікаў, зямельныя ўчасткі (часткі зямельных участкаў) якіх уключаюцца ў склад зямель помніка прыроды. У межах помніка прыроды будзе спынены рэжым аховы і выкарыстання ў адпаведнасці з законам Рэспублікі Беларусь «Аб асабліва ахоўных прыродных тэрыторыях».

Помнік прыроды знаходзіцца за 12,3 км на ўсход ад пасёлка гарадскога тыпу Багушэўск, за 2,95 км на паўднёвы ўсход ад вёскі Шчытоўка Багушэўскага сельсавета. Ён уяўляе сабой чатыры блізка размешчаных адзін да аднаго дрэва дуба чарэшчатага (Quercus robur L.) узросту каля 210-220 гадоў. Яны размешчаны паблізу ўзлеску ляснога масіву ў выдзелах 8 і 25 квартала 18 Сафіеўскага лясніцтва дзяржаўнай лесагаспадарчай установы «Багушэўскі лясгас». Усе дрэвы прыблізна аднаго ўзросту, іх вышыня вар’іруе ў інтэрвале 31-38 метраў, стан ва ўсіх здавальняючы. Па марфаметрычных, узроставых паказчыках і эстэтычным успрыманні дрэвы дуба чарэшчатага з’яўляюцца рэдкімі для тэрыторыі Віцебскай вобласці.

Рашэнне ўступае ў сілу пасля яго афіцыйнага апублікавання.