Абнаўленне дарожнага пакрыцця

Работы па замене асфальту толькі стартавалі, але першыя вынікі ўжо ёсць. На сённяшні дзень цалкам абноўлена пакрыццё на шэрагу вуліц. У хуткім часе рамонт працягнецца ў Маскоўскім раёне, а таксама па іншых адрасах — гэта першачарговыя аб’екты на бліжэйшыя тыдні.

Што датычыцца агульных планаў на год, то прадпрыемства разлічвае замяніць значны аб’ём асфальтабетоннага пакрыцця — прыкладна на ўзроўні мінулага года. Галоўная ўвага надаецца не проста колькасці, а якасці.

«Мы прымяняем штогод новыя мадэрнізаваныя саставы асфальтабетонных сумесяў. Асноўная задача — мінімізацыя калейнасці на прыпыначных пунктах», — адзначыў Максім Белавус.

Вясновая «касметыка» для малых архітэктурных форм

Асноўныя работы цяпер вядуцца ў рамках месячніка. Увага спецыялістаў сканцэнтравана на прывядзенні горада ў парадак пасля зімы.

«Мы ў асноўным цяпер сканцэнтраваны на мыйцы і афарбоўцы малых архітэктурных форм: прыпыначныя павільёны, лаўкі, навесы, падпорныя сценкі, балюстрады, уязныя знакі ў горад Мінск», — расказаў кіраўнік «Гаррэмаўтадара».

Гэты фронт работ плануецца цалкам завяршыць да сярэдзіны красавіка.

Новыя прыпынкі

Асобны і важны кірунак — абнаўленне прыпынкавых павільёнаў. Горад працягвае рэалізоўваць доўгатэрміновую праграму, паводле якой састарэлыя канструкцыі, якія страцілі знешні выгляд і цалкам амартызаваны, планамерна замяняюцца на новыя.

«Таксама сёлета ў нас падпісана трохгадовая праграма. Першы год гэтай праграмы летась мы рэалізавалі паспяхова. Яна прадугледжвае штогадовую замену пэўнай колькасці павільёнаў новага ўзору», — растлумачыў Максім Яўгенавіч.

Дзякуючы гэтаму да канца года доля сучасных прыпынкаў на вулічна-дарожнай сетцы сталіцы можа наблізіцца да паловы. Гараджане ўсё часцей будуць бачыць вакол сябе акуратныя, зручныя і прыгожыя аб’екты, якія фарміруюць новае аблічча Мінска.

Надзея ЗУЕВА