Паводле даных следства, у ліпені мужчына звярнуўся да саматужнага аўтаслесара для рамонту асабістага Renault Logan. У аўтамабілі былі няспраўнасці рухавіка і стаяначнага тормаза. Нелегальны аўтасэрвіс знаходзіўся ў адным з гаражоў ГСПК. Майстар адрамантаваў рухавік і запрасіў кліента прыняць работу. Аўтамабіль стаяў на праезнай частцы насупраць варотаў гаража. Мужчыны агледзелі капотную прастору. Затым аўтаслесар вырашыў запусціць рухавік для дэманстрацыі выкананага рамонту. Ён належным чынам не пераканаўся, што рычаг пераключэння перадач не знаходзіцца ў нейтральным становішчы, і павярнуў ключ у замку запальвання. Renault пачаў рухацца і збіў мужчыну, які стаяў наперадзе. З пераломам нагі аўтаўладальніка даставілі ў бальніцу. 

Устаноўлена, што аўтаслесар рамантаваў аўтамабілі без афіцыйнай рэгістрацыі свайго бізнесу. Адпаведная інфармацыя накіравана следствам у падатковае падраздзяленне. Акрамя таго, у момант здарэння майстар знаходзіўся ў стане алкагольнага ап’янення. У 2016 годзе ён прыцягваўся да адміністрацыйнай адказнасці за кіраванне матацыклам у нецвярозым стане. Па заканчэнні пазначанага тэрміну вадзіцельскае пасведчанне не аднавіў. 

На падставе сабраных па справе доказаў 45-гадоваму жыхару Гомеля прад’яўлена абвінавачванне па ч. 4 арт. 317 (парушэнне ПДР і эксплуатацыі транспартных сродкаў асобай, якая кіруе транспартным сродкам у стане алкагольнага ап’янення, што пацягнула па неасцярожнасці прычыненне цяжкага цялеснага пашкоджання) КК. З санкцыі пракурора да яго прыменена мера стрымання ў выглядзе заключэння пад варту.