Міхаіл Уладзіміравіч як сапраўдны педагог, які вырас і сфарміраваў сваю асобу на базе савецкай педагагічнай школы, усё дасканала вывучыў, склаў выразны план «урока» і быў цалкам гатовы. Фрунзенскі раён, які ён прадстаўляе у Палаце прадстаўнікоў, з’яўляецца самым сацыяльным раёнам сталіцы. У раёне размешчана амаль 50 устаноў агульнай сярэдняй адукацыі, каля 100 — дашкольнай, таму работы, асабліва ў рамках дзейнасці яго камісіі, наперадзе было шмат. Дэпутат пры гэтым усведамляў увесь маштаб і быў загадзя настроены на тое, што многія пытанні давядзецца адкрываць зноўку і паглыбляцца дадаткова ў вывучэнне заканадаўства, напрыклад, у сферу жыллёва-камунальнай гаспадаркі.

— Фрунзенскі раён — ці не самы густанаселены ў сталіцы... Якія праблемы хвалююць жыхароў вашай акругі?

— У гэтым плане мне вельмі пашанцавала. Насельніцтва Фрунзенскага раёна горада Мінска гатова да зносін, настроена на канструктыўны дыялог. Самае галоўнае пры правядзенні прамых тэлефонных ліній або асабістых прыёмаў грамадзян — не проста даведацца аб праблеме, з якой звярнуўся грамадзянін, а пастарацца раскрыць яго ўнутраны боль і зразумець, чаму гэтая праблема ўзнікла. Кожны прыходзіць са сваёй гісторыяй, і важны складнік нашай работы — атрымаць шчырасць ад грамадзян, сумленнасць. Цікавай формай работы ў гэтым кірунку з’яўляюцца сумесныя прыёмы дэпутатаў Палаты прадстаўнікоў і кіраўніцтва адміністрацыі раёна. Гэта дазваляе раскрыць праблему з кожнага боку і вырашыць яе, грунтуючыся не толькі на вопыце заканадаўчай ініцыятывы, але і «па-гаспадарску», адразу на ўзроўні кіруючага апарату.  

З асноўных тэм зваротаў можна вылучыць бягучы і капітальны рамонт, адукацыю, жыллёва-камунальную гаспадарку, будаўніцтва арэнднага жылля і добраўпарадкаванне, а таксама пытанні, звязаныя са зменамі маршрутаў грамадскага транспарту — простыя і зразумелыя нашым грамадзянам рэчы, тое, што трэба для жыцця.

Актуальнай тэмай выступала водазабеспячэнне ў нашым раёне, але сёння праблема вырашана, за што хочацца яшчэ раз сказаць дзякуй кіраўніцтву горада і асабіста Прэзідэнту ад імя жыхароў маёй Каменнагорскай выбарчай акругі.

— Дэпутаты Палаты прадстаўнікоў — гэта ідэалагічныя работнікі, асабліва ва ўмовах электаральнай кампаніі...

— Тэма выбарчай кампаніі цяпер сапраўды адна з ключавых. Мы штодня робім выбар: што сёння надзець, якім чынам дабрацца на працоўнае месца і гэтак далей. Аднак у нашым жыцці ўзнікаюць сітуацыі, калі наш выбар можа паўплываць не толькі на тое, як пройдзе наш дзень, але і на будучыню цэлай дзяржавы. Я вельмі ганаруся, што ў дадзены момант у мяне і ў маіх калег ёсць магчымасць і нават неабходнасць быць тым, хто мае зносіны з людзьмі на тэму выбарчай кампаніі.

Мы стараемся данесці на сустрэчах з людзьмі, што прыйсці і аддаць свой голас — гэта важна! Дарослыя людзі гатовы да такіх размоў, яны ведаюць, што такое электаральная кампанія, і разумеюць усю важнасць маючай адбыцца падзеі.

У рамках сваёй работы ў акрузе я імкнуся закрануць і тых, для каго гэта будуць першыя або адны з першых выбараў — моладзь. Важна, каб у гэты момант побач з моладдзю апынуўся чалавек, які растлумачыць ім усё простай і зразумелай мовай.

Я педагог, мне блізка разуменне маладзёжнага асяроддзя і таго, якім чынам лепш выбудаваць дыялог з імі так, каб інфармацыя была пачутая і зразуметая. Так, напрыклад, мы правялі ўжо чатыры сустрэчы з навучэнцамі каледжаў горада Мінска ў рамках праекта Палаты прадстаўнікоў «Моладзь для Беларусі!» Цесна працую з Маладзёжным парламентам пры Нацыянальным сходзе па гэтым пытанні. Дзесьці трохі пазычаю ў іх ідэі і «фішкі», дзесьці стараюся даць невялікую параду. Зноў жа — звычка педагога…

Фота з архіва дэпутата