Традыцыйны святочны бутэрброд з чырвонай ікрой, які многія лічаць далікатэсам, можа нанесці сур’ёзную шкоду здароўю. Аб гэтым паведамляе «Мінская Праўда» са спасылкай на кандыдата медыцынскіх навук, дацэнта кафедры шпітальнай педыятрыі № 2 Інстытута мацярынства і дзяцінства Пірагоўскага ўніверсітэта Вольгу Тарасаву.
Урачы тлумачаць, што спалучэнне ікры, белага хлеба і сметанковага масла стварае небяспечную нагрузку на стрававальную сістэму. Вольга Тарасава канкрэтызавала рызыкі:
«Не намазвайце ікру на белы хлеб з маслам. Гэта трайны ўдар па падстраўнікавай залозе і печані: хуткія вугляводы плюс жывёльны тлушч, плюс салёны тлусты прадукт».
Спецыяліст прапануе больш бяспечныя альтэрнатывы. Ікру можна падаваць з нейтральным крэкерам або цэльназерневым хлебцам, спалучаць з палоўкай варанага яйка або лустачкай авакада. Таксама дапушчальна ўжываць яе асобна, як вітамінавы дадатак.
Эксперт звярнула ўвагу на неабходнасць кантролю солі: калі ў меню ёсць ікра, трэба зменшыць яе колькасць у іншых стравах. Да супрацьпаказанняў адносяцца абвастрэнні захворванняў СКТ, гіпертанія II–III ступені, цяжкія хваробы нырак, алергія, а таксама цяжарнасць, якая суправаджаецца ацёкамі і павышаным ціскам.
Асобна ўрачы нагадваюць аб важнасці пакупкі якаснага прадукту. Няякасныя або падробленыя вырабы могуць прывесці да сур’ёзных атручэнняў, таму набываць ікру варта толькі ў правераных пастаўшчыкоў.
