Падводзячы прамежкавыя вынікі праверкі боегатоўнасці Узброеных Сіл, якая ажыццяўляецца па распараджэнні Прэзідэнта, Аляксандр Вальфовіч адзначыў, што вайскоўцы паказалі сябе цалкам годна. «Недахопы ёсць, усё гэта будзе прааналізавана. Але наша задача не проста паставіць адзнаку тым, каго мы правяраем, а выявіць слабыя месцы, паглядзець, што не атрымалася, на што звярнуць увагу ў падрыхтоўцы афіцэрскага складу, — заявіў ён. — Папярэдне хацелася б адзначыць, што, працуючы на палігонах, асабовы склад гарэў жаданнем паказаць вынік. Хачу сказаць, што нашы воінскія часці здольныя выканаць задачы».

Аляксандр Вальфовіч расказаў, што ў ходзе другога этапу праверкі боегатоўнасці Узброеных Сіл ставілася задача адпрацаваць як мага больш шырокі спектр пытанняў. «Былі адпрацаваныя такія пытанні, як загрузка матэрыяльных сродкаў на транспарт, атрыманне боепрыпасаў на пэўных складах, здзяйсненне маршаў на розныя адлегласці. Пры гэтым розным воінскім часцям дасталіся розныя маршруты», — дадаў ён.

Па словах дзяржсакратара, вайскоўцы выканалі не толькі пешы марш-кідок на палігонах, але і марш на тэхніцы на пэўныя рубяжы. Падчас маршу на кожнае падраздзяленне аказвалі ўздзеянне ўнутраныя войскі, якія выступалі ў якасці ўмоўнага праціўніка. Пры гэтым уздзеянне аказвалася ў тым ліку з выкарыстаннем БПЛА. Тут Аляксандр Вальфовіч адзначыў важнасць сродкаў радыёэлектроннай барацьбы.

«У падраздзяленні 120-й брыгады паступілі нашы сродкі радыёэлектроннай барацьбы, якія былі ўстаноўленыя на тэхніку. І ўздзеянне квадракоптараў на калоны, якія ішлі, не ўвянчалася поспехам. Гэта значыць нашы сродкі паказалі эфектыўнасць і ў бліжэйшы час яны будуць паступаць і ў іншыя воінскія часці, — сказаў Аляксандр Вальфовіч. — Спецыяльная ваенная аперацыя паказвае, што без такіх сродкаў радыёэлектроннай барацьбы ніводная расійская або ўкраінская калона не здзяйсняе рух. На мой погляд, сродкі радыёэлектроннай барацьбы найбольш эфектыўныя, каб абараніць ці засцерагчы асабовы склад».

Фінальнай часткай гэтага этапу стала правядзенне на палігонах кантрольных заняткаў па агнявой і фізічнай падрыхтоўцы: «Агнявая вывучка і фізічная вынослівасць вайскоўцаў — гэта аснова, якая патрэбна на полі бою. На гэта быў зроблены асноўны ўпор, і гэта было патрабаваннем нашага Прэзідэнта».

Кіраўнік дзяржавы звярнуў увагу, што асаблівы адбітак на праверку наклала няпростае надвор’е. У лютым на змену маразам прыйшло пацяпленне, што прывяло да туману і дрэннай бачнасці, асабліва ў ранішнія гадзіны. Акрамя таго, на ход праверкі паўплываў ледзяны дождж, які прывёў да абледзянення пэўных узораў узбраення і ваеннай тэхнікі.

«У гэтым была пэўная складанасць. Але хто будзе выбіраць надвор’е ў рэальным баі? Таму вайскоўцы дзейнічалі ва ўмовах, якія былі максімальна набліжаныя да рэальных», — канстатаваў Аляксандр Вальфовіч.

Як паведамлялася БелТА, маштабная праверка Узброеных Сіл па даручэнні Прэзідэнта Беларусі пачалася 16 студзеня. Першачарговая мэта — убачыць аб’ектыўную карціну, рэальны стан войскаў, ацаніць дзеянні вайскоўцаў. Менавіта таму мерапрыемствы носяць раптоўны характар. Ключавой асаблівасцю праверкі з’яўляецца яе арганізацыя. Кіраўнік дзяржавы прыводзіць у баявую гатоўнасць воінскія часці, абмінаючы Міністэрства абароны і Генеральны штаб.

Прэзідэнт падпісвае распараджэнне пад грыфам «сакрэтна», у якім паказана задума маючай адбыцца праверкі. Дзяржсакратар Савета Бяспекі Аляксандр Вальфовіч атрымлівае закрыты пакет з дакументам, пасля чаго выязджае ў вызначаную кіраўніком дзяржавы воінскую часць. Па даручэнні беларускага лідара да правядзення праверкі таксама быў прыцягнуты старшыня КДК Васіль Герасімаў.

Аляксандр Лукашэнка трымае ход праверкі на асабістым кантролі, рэгулярна заслухоўвае даклады Дзяржаўнага сакратара Савета Бяспекі.