Юрый Горлаў адзначыў, што ў час кантактаў на вышэйшым узроўні паміж Беларуссю і М’янмай былі дасягнуты канкрэтныя дамоўленасці, якія датычацца аграпрамысловага комплексу. Цяпер ідзе работа па іх рэалізацыі. «Хачу сказаць, што ў нас наладжана цеснае ўзаемадзеянне. Мы стварылі рабочую групу, якая перыядычна праводзіць абмены думкамі ў фармаце відэа-канферэнц-сувязі. Мы абмяркоўваем далейшыя перспектывы супрацоўніцтва, яго акцэнты і прыярытэты», — канстатаваў кіраўнік Мінсельгасхарча.

У цэлым, як адзначыў Юрый Горлаў, за першую палову 2026 года тавараабарот паміж Беларуссю і М’янмай павялічыўся ў 2,3 раза ў параўнанні з аналагічным перыядам мінулага года. На гэты момант узаемны гандаль складаецца ў асноўным з экспарту беларускіх харчовых тавараў на м’янманскі рынак.

«Калі гаварыць пра пастаўку нашых тавараў, то гэта, напрыклад, сухія малочныя прадукты. Акрамя таго, на Беларуска-м’янманскім бізнес-форуме ў Мінску былі падпісаны кантракты на рэалізацыю пшанічнай мукі. Такім чынам, ёсць сегменты, якія мы можам заняць на м’янманскім рынку, — падкрэсліў міністр. — Мы таксама накіравалі калегам узоры іншых нашых малочных прадуктаў, у прыватнасці сметанковага масла».