«Міністэрствам антыманапольнага рэгулявання і гандлю на пастаяннай аснове праводзіцца сістэмная работа па забеспячэнні харчовай бяспекі краіны. МАРГ сумесна з канцэрнамі, вытворцамі і гандлёвымі арганізацыямі падпісана пагадненне аб нарошчванні аб’ёмаў рэалізацыі тавараў айчыннай вытворчасці. Па выніках 2025 года суб’екты павінны прырастаць на 1 працэнт да ўжо сфарміраваных аб’ёмаў рэалізацыі айчынных тавараў. Рэалізацыя беларускіх тавараў харчовай групы павінна скласці не менш за 85 працэнтаў, нехарчовай — крыху больш за 38 працэнтаў», — расказала Святлана Караткевіч.

17 верасня на пляцоўцы МАРГ прайшла рабочая сустрэча з удзелам прадстаўнікоў сферы прамысловасці, гандлёвых сетак, інтэрнэт-магазінаў і інтэрнэт-пляцовак для абмеркавання пытанняў насычэння ўнутранага рынку таварамі айчыннай вытворчасці. Паводле слоў намесніка міністра, сустрэча накіравана ў першую чаргу на зверку гадзіннікаў: як вытворцы і гандлёвыя арганізацыі выконваюць нормы падпісанага імі пагаднення.

«Таксама мы хочам высветліць, ці ёсць нейкія ключавыя праблемы, якія неабходна вырашаць сумесна як вытворцам, так і гандлёвым арганізацыям. На сёння пагадненне падпісалі больш за 500 суб’ектаў усіх форм уласнасці, у тым ліку буйныя маркетплэйсы, буйныя гандлёвыя сеткі і нашы вытворцы. Таму сустрэча нацэлена ў першую чаргу на дасягненне тых прагнозных паказчыкаў, якія мы прапісалі ў гэтым дакуменце. Пагадненне з’яўляецца добраахвотным, дзейнічае да 31 снежня 2030 года. Сёння мы спадзяёмся выпрацаваць ключавыя напрамкі далейшай работы па выкананні яго норм. Разлічваем, што па выніках нашай сустрэчы сітуацыя на спажывецкім рынку палепшыцца, у першую чаргу па рэалізацыі айчынных харчовых тавараў», — звярнула ўвагу Святлана Караткевіч.

Актыўна развіваецца дзейнасць маркетплэйсаў, інтэрнэт-магазінаў. Сёння доля тавараабароту гэтага віду гандлю складае амаль 12 працэнтаў. «І для таго, каб паспець за трэндамі, нашы вытворцы павінны ім адпавядаць. Таму сустрэча якраз і нацэлена на тое, каб абазначыць асноўныя напрамкі ў дзейнасці, выявіць тыя праблемныя пытанні, якія так ці інакш не даюць магчымасці пашыраць пазіцыянаванне айчынных вытворцаў на інтэрнэт-пляцоўках і, адпаведна, выпрацаваць механізм узаемадзеяння паміж інтэрнэт-пляцоўкамі, інтэрнэт-магазінамі і нашымі вытворцамі», — дадала намеснік міністра.

Удзельная вага продажу беларускіх тавараў у рознічным тавараабароце арганізацый гандлю ў другім квартале 2025 года склала 55,6 працэнта — плюс 2,1 працэнтнага пункта ў параўнанні з першым кварталам 2025 года. Адзначаецца рост продажаў айчыннай прадукцыі па 45 таварных групах з 78, якія ўлічваюцца Белстатам, у тым ліку харчовых — па 32 з 54.

Калі параўноўваць першае паўгоддзе 2025 года са студзенем — чэрвенем мінулага года, продажы айчынных яблыкаў павялічыліся амаль на 10 працэнтаў, бульбы — на 11,2 працэнта, буракоў — на 25,4 працэнта, морквы — амаль на 17 працэнтаў, рыбы — на 19,3 працэнта, алею — на 33,2 працэнта, грэчкі — на 27,3 працэнта, макаронных вырабаў — на 2 працэнты, сметанковага масла — на 10,7 працэнта, сыроў — на 4,3 працэнта, цукрыстых кандытарскіх вырабаў — на 3,5 працэнта, мучных кандытарскіх — на 2,8 працэнта.