Аб’екты чыгуначнай інфраструктуры з’яўляюцца зонамі павышанай небяспекі, знаходжанне грамадзян на якіх патрабуе захавання нормаў бяспекі ў мэтах недапушчэння прычынення шкоды жыццю і здароўю. За шэсць месяцаў зарэгістравана 26 выпадкаў траўміравання грамадзян рухомым чыгуначным саставам, з іх 15 са смяротным зыходам. Сярод загінулых — адзін непаўнагадовы і два пенсіянеры.

Асноўнымі прычынамі сталі асабістая бестурботнасць і грэбаванне правіламі паводзін на чыгунцы.

У ліпені лакаматыўнымі брыгадамі 17 разоў ужывалася экстраннае тармажэнне для прадухілення наезду на асоб, якія парушалі правілы знаходжання на чыгунцы. Аднак у адным выпадку пазбегнуць трагедыі не ўдалося — чалавек загінуў.

У пераважнай большасці такія сітуацыі пагаршаюцца станам алкагольнага ап’янення. Так, увечары 10 ліпеня на станцыі «Баранавічы-Палескія» экстранным тармажэннем прадухілены наезд на жанчыну, якая ляжала ў каляі пуці. Раніцай наступнага дня на 718-м км перагону Багданаў — Валожын машыніст таксама тармазіў, каб не наехаць на галоўным пуці на мужчыну, які ляжаў у каляі.

Па ўсіх фактах праводзяцца праверкі, дзеянням правапарушальнікаў будзе дадзена прававая ацэнка. У Генпракуратуры нагадалі, што ч. 4 арт. 18.2 Кодэкса аб адміністрацыйных правапарушэннях устаноўлена адказнасць за парушэнне правілаў пераходу праз чыгуначныя пуці, а роўна знаходжанне на пуцях у месцах, не прызначаных для іх перасячэння. Санкцыя прадугледжвае штраф у памеры да дзвюх базавых велічынь.