У мінулыя суткі ўскрыліся асобныя прытокі Нёмана і Сожа, цалкам ачысціўся ад ледзяных утварэнняў прыток Нёмана рака Свіслач каля вёскі Дзіневічы.

«Па стане на 25 лютага на рэках назіраецца ў асноўным ледастаў і ледастаў з палонкамі, таўшчынёй 13-45 см. На рэках паўднёвай і паўднёва-заходняй часткі тэрыторыі краіны ў лядовым покрыве павялічыліся палонкі і закраіны, адзначаецца вада на лёдзе. На вадасховішчах Вілейскае, Чыгірынскае, Салігорскае, Заслаўскае, Чырвоная Слабада, азёрах Нарач, Дрывяты, Чырвонае, Лукомскае назіраецца суцэльнае ледзяное покрыва, таўшчыня лёду складае ад 20 да 42 см. Рост узроўняў вады з інтэнсіўнасцю 1-14 см за суткі назіраецца на рэках басейнаў Нёмана, Віліі, Прыпяці, на Дняпры каля Оршы і гарадскога пасёлка Лоеў, яго прытоках, на Бярэзіне каля Барысава, Сожы каля Гомеля, а таксама на асобных іх прытоках. Найбольш інтэнсіўны (да 50 см за суткі) рост узроўняў вады адбываецца на рэках басейна Заходняга Буга. На рэках басейна Заходняй Дзвіны, вялікай працягласці Дняпра, Бярэзіны і Сожа назіраецца спад узроўняў вады і роўны іх ход», — расказалі ў Белгідрамеце.

На прытоку Прыпяці рацэ Пціч каля вёскі Першая Слабодка ўзровень вады перавышае адзнаку выхаду вады на пойму.

Паводле прагнозаў гідролагаў, у найбліжэйшыя суткі на Віліі каля аграгарадка Сцешыцы ўзровень вады перавысіць адзнаку выхаду вады на пойму. На рэках басейнаў Нёмана, Віліі, Заходняга Буга і Прыпяці захаваецца рост узроўняў вады, раставанне лядовага покрыва працягнецца. На рэках басейнаў Заходняй Дзвіны, Дняпра, Бярэзіны і Сожа будуць адзначацца ваганні ўзроўняў вады, лядовая абстаноўка істотна не зменіцца.