Непадалёку ад трасы М-3 Мінск-Віцебск пошукавікі знайшлі тры ямы-магілы, у якіх па папярэдніх дадзеных ляжаць звыш 200 чалавек. У пераважнасці — старыя, дзеці і жанчыны. Амаль без асабістых рэчаў і прадметаў, па якіх спецыялісты маглі б устанавіць асобы. Ёсць толькі фрагменты адзення, гузікі, лыжка і гільзы ад патронаў. Дадзенае месца выяўлена ў ходзе расследавання крымінальнай справы аб генацыдзе беларускага народа ў гады Вялікай Айчыннай.

«Мы працуем у архівах, працуем з архіўнымі крымінальнымі справамі ў дачыненні да асоб, якія былі асуджаныя за злачынствы, звязаныя з генацыдам беларускага народа ў далёкія 40-я і 50-я гады. Атрымліваем адтуль адпаведную інфармацыю, маем зносіны з насельніцтвам і такім чынам устанаўліваем новыя месцы масавага знішчэння мірнага насельніцтва», — расказаў пракурор Віцебскай вобласці Андрэй Скурат.

Гэта страшнае месца непадалёку ад трасы было знойдзена на падставе ўспамінаў мясцовага жыхара Леаніда Замкоўскага. Будучы 10-гадовым дзіцем, хлопчык бачыў, як немцы вывозілі на ўскраіну горада мірных жыхароў і, магчыма, ваеннапалонных і там расстрэльвалі. Інфармацыя пра гэта была апублікаваная ў мясцовай газеце «Лепельскі край». Акрамя таго, будучы апытаным падчас расследавання крымінальнай справы, лепельскі краязнаўца Уладзімір Шушкевіч таксама распавёў, што яшчэ ў 80-х гадах мінулага стагоддзя мясцовы жыхар расказаў, што сам бачыў, як нямецкія салдаты расстрэльвалі мірных жыхароў на ўчастку мясцовасці за вуліцай Чуйкова злева ад аўтадарогі, якая вядзе ў вёску Заслонава. Успаміны пра гэта месца расстрэлу мірных жыхароў таксама ёсць ў кнізе Івана Рысака «Памяць пра мінулае», якая расказвае пра жыццё Лепеля падчас акупацыі нямецка-фашысцкімі войскамі.

Падчас раскопак бачна, як людзі ляжалі тварам да зямлі і іх расстрэльвалі ў патыліцу. На гэта немагчыма глядзець без дрыжыкаў. Па заканчэнні пошукавых работ і неабходных экспертных даследаванняў астанкі будуць пахаваныя з ушанаваннямі, а памяць аб загінуўшых увекавечана. 

Расследаванне фактаў генацыду на беларускай зямлі ў гады Вялікай Айчыннай вайны працягваецца. За чатыры гады па рэспубліцы апытана амаль 20 тысяч чалавек. Пошукавыя работы праходзяць па ўсёй краіне, толькі ў Віцебскай вобласці раскопкі будуць весціся на чатырох участках.

Фота газеты «Лепельскі край»