Новы фармат дапамогі арыентаваны на сем’і з дзецьмі і стане часткай рэгіянальнай дэмаграфічнай праграмы, каардынатарам якой з 2026 года выступае камітэт па працы і сацабароне. Пункты пракату дазволяць бацькам бясплатна атрымліваць неабходныя рэчы на час, не трацячы сродкі на іх пакупку, адзначыла Вера Астапенка:

— Мы плануем адкрыць пункты пракату для тых сем’яў, дзе нараджаюцца дзеткі, каб чалавек не набываў рэчы першай неабходнасці, мог прыйсці і ўзяць. Для гэтага будзем прыцягваць спонсарскія сродкі, пазабюджэтныя крыніцы і, вядома, дапамогу ад грамадзян, якія ўжо выгадавалі сваіх дзяцей. Яны могуць перадаць каляскі і хадункі ў нашы цэнтры. Атрымаюцца добрыя пункты пракату.

Чакаецца, што такая ініцыятыва не толькі знізіць фінансавую нагрузку на маладыя сем’і, але і дасць магчымасць рацыянальна выкарыстоўваць дзіцячыя тавары, якія хутка страчваюць актуальнасць, але застаюцца ў добрым стане.

Паралельна ў рэгіёне працягваецца развіццё іншага запатрабаванага сэрвісу — службы сацыяльнага таксі. Першымі паслугу ацанілі жыхары Віцебска і Аршанскага раёна, дзе праект стартаваў у 2025 годзе.

— У гэтым годзе запланавана адкрыццё сацыяльнага таксі ў Полацкім раёне і Наваполацку, — паведаміла Вера Астапенка. — У планах пяцігодкі — укараніць паслугу і ў іншых гарадах, дзе яна будзе найбольш запатрабаваная.

Сацыяльнае таксі прызначана для людзей з інваліднасцю і пажылых грамадзян, якім патрабуецца дапамога ў перамяшчэнні да сацыяльна значных аб’ектаў: бальніц, аптэк, устаноў сацабароны. Запуск сэрвісу стаў лагічным працягам работы па стварэнні даступнага асяроддзя: да 2025 года ўсе ўстановы сацабароны рэгіёна былі абсталяваны з улікам патрэбнасцяў маламабільных груп насельніцтва.

Абедзве ініцыятывы — і пункты пракату, і сацыяльнае таксі — частка комплекснай работы па павышэнні якасці жыцця ў рэгіёне.