Кожны дзень сотні жыхароў Гродзеншчыны звяртаюцца ў загсы, каб зарэгістраваць нараджэнне дзіцяці, узяць шлюб ці атрымаць дакументы з архіва. Аб асабістых гісторыях, унікальных традыцыях кожнага кутка вобласці раскажа новы праект.

Чытачоў чакаюць гістарычныя рарытэты — яны даведаюцца аб тым, як выглядаюць кнігі запісаў 1944–1945 гадоў і што ў іх адзначана. Аўтары пазнаёмяць з калектывамі загсаў: прадставяць тых, хто сустракае маладых у іх галоўны дзень і рэгіструе нованароджаных. Грамадзяне таксама даведаюцца, дзе знаходзіцца самая старажытная зала шлюбаў Гродзенскай вобласці, дзе створаны новыя, сучасныя прасторы з дызайнерскім афармленнем. Будзе прадстаўлена інфармацыя аб адрасах, тэлефонах і графіках работы ўсіх загсаў вобласці.

Старт праекту дадуць у архіве органаў загс галоўнага ўпраўлення юстыцыі, размешчанага ў будынку, які з’яўляецца гісторыка-культурнай каштоўнасцю, на вуліцы Сацыялістычнай у Гродне. Тут захоўваецца больш за 4 млн запісаў актаў грамадзянскага стану, пачынаючы з 1944 года.

Пасля дэманстрацыі багаццяў архіва ў рамках праекта раскажуць аб загсах кожнага раёна Гродзенскай вобласці. Матэрыялы будуць выходзіць на працягу ўсяго года ў афіцыйным Telegram-канале і на сайце галоўнага ўпраўлення юстыцыі.

«У Год беларускай жанчыны нам асабліва хочацца расказаць пра людзей, якія стаяць за кожным запісам у дакументах. У загсах Гродзенскай вобласці працуюць выдатныя жанчыны — уважлівыя і адданыя сваёй справе. Менавіта яны ствараюць тую самую атмасферу шчасця, з якой у людзей асацыіруецца загс. Наш праект — гэта магчымасць паказаць не проста ўстановы, а жывых людзей, іх гісторыі і традыцыі, якія беражліва перадаюцца з пакалення ў пакаленне», — адзначыла начальнік галоўнага ўпраўлення юстыцыі Гродзенскага аблвыканкама Алена Юргель.