Аляксандр Лукашэнка падчас наведвання сельгаспрадпрыемства «Шыпяны-АСК» у Смалявіцкім раёне 21 лютага 2025 года

Выязны семінар па сельгастэматыцы Прэзідэнт правёў у Смалявіцкім раёне ў пятніцу, а ўжо на выхадныя адказныя асобы паехалі па рэгіёнах вывучаць сітуацыю на месцах. Намеснік прэм’ер-міністра Анатоль Сівак пабываў на асобных сельскагаспадарчых прадпрыемствах Рагачоўскага раёна.

«Задача — убачыць не самыя лепшыя прыклады, каб даць пэўныя ацэнкі, сфармуляваць і абмеркаваць праблемы канкрэтных гаспадарак. Паглядзім і супаставім факты з інфармацыяй, якая паступіла аб тым, што ў раёне ёсць гаспадаркі, дзе патрабуецца пераразмеркаванне кармоў ад іншых прадпрыемстваў. Гэта ўжо факт, неабходна высветліць першапрычыну», — адзначыў Анатоль Сівак. Паводле слоў віцэ-прэм’ера, важна мець дакладную інфармацыю, на аснове якой можна прымаць эфектыўныя рашэнні і якасна ўплываць на сітуацыю.

Адным з пунктаў у маршруце стала малочнатаварная ферма на 600 галоў дойнага статка ў населеным пункце Заполле, паведамляе БелТА. Тут да пачатку вясны плануюць увесці ў эксплуатацыю новы кароўнік на 290 галоў, у якім прадугледжаны дзве выгульныя пляцоўкі, сістэма ўвільгатнення паветра, прыменены і іншыя рашэнні для камфортнага ўтрымання жывёл.

Старшыня Камітэта дзяржкантролю, упаўнаважаны прадстаўнік Прэзідэнта па Гродзенскай вобласці Васіль Герасімаў праінспектаваў ход выканання даручэнняў кіраўніка дзяржавы ў сельскагаспадарчых арганізацыях у Карэліцкім, Навагрудскім, Слонімскім, Дзятлаўскім і Зэльвенскім раёнах Гродзенскай вобласці. У шэрагу гаспадарак выяўлены недахопы і недагляды, якія ў найбліжэйшы час павінны быць ліквідаваны.

Так, па выніках наведвання мехмайстэрняў КСПУП «Птушкафабрыка «Чырвонаармейская» Карэліцкага раёна Васіль Герасімаў даручыў прыняць аператыўныя меры па актывізацыі работ, звязаных з рамонтам тэхнікі, у першую чаргу той, якая будзе задзейнічана на ранніх этапах правядзення палявых работ. Цяпер гатоўнасць тэхнікі ў гэтай гаспадарцы знаходзіцца на ўзроўні 50 працэнтаў. Таксама ён звярнуў увагу на недастатковыя тэмпы назапашвання мінеральных угнаенняў, забяспечанасць якімі на будучую пасяўную кампанію складае трэць ад неабходнай колькасці. Ёсць пытанні і па кармах — гаспадарка на працягу шэрагу гадоў, у тым ліку і ў бягучым годзе, з-за недахопу сваіх травяных кармоў ужо ў лютым набывае іх у іншых арганізацыях.

Недахопы пры пастаноўцы тэхнікі на захоўванне выяўлены ў ААТ «Кашалёва-Агра» Навагрудскага раёна. Не ўсюды былі падкладзены драўляныя паддоны пад рабочыя механізмы глебаапрацоўчай тэхнікі, што непазбежна прывядзе да заўчаснага іх зносу. Таксама кіраўніку гаспадаркі ўказана на недастатковы кантроль за якасцю рамонту тэхнікі і выкананнем графікаў яго правядзення.

• Пры наведванні сельгаспрадпрыемства «Паўлава-Агра» Слонімскага раёна Васіль Герасімаў удзяліў асноўную ўвагу эфектыўнаму выкарыстанню і рамонту энерганасычаных трактароў. Адзін з такіх трактароў у гаспадарцы стаіць без рухавіка, які накіравалі для рамонту ў спецыялізаваную арганізацыю. Пры гэтым кіраўнік КДК цікавіўся меркаваннем кіраўніка «Паўлава-Агра», наколькі якасна такія прадпрыемствы, у тым ліку райаграсэрвісы, ажыццяўляюць рамонт энерганасычаных трактароў.

Якасць кармоў і пытанні іх захоўвання вывучаны ў СВК «Сынкавічы» Зэльвенскага раёна. І, як аказалася, тут ёсць недахопы. У праверанай сянажна-сіласнай траншэі на МТК «Елка» былі ўстаноўлены парушэнні тэхналогіі нарыхтоўкі кармоў. Даўжыня зялёнай масы кукурузы аказалася значна большай, чым належныя 5 см, што звязана з недахопамі яшчэ падчас нарыхтоўкі кармоў пры рэгуляванні корманарыхтоўчай тэхнікі.

Ва ўсіх гаспадарках Васіль Герасімаў паразмаўляў з іх работнікамі. Кіраўнік КДК таксама цікавіўся наяўнымі праблемамі і ўмовамі працы ў спецыялістаў, якія працуюць непасрэдна на жывёлагадоўчых аб’ектах і мехдварах. Старшыня Камітэта дзяржкантролю адзначыў, што часу на разварушванне няма. Па ўсіх праблемных пытаннях абазначаны неабходныя меры — недахопы павінны быць ліквідаваны ў найбліжэйшыя дні. Выкананне выдадзеных даручэнняў знаходзіцца на кантролі Камітэта дзяржкантролю Гродзенскай вобласці.

Фота БелТА