Спагнанне аліментаў і выдаткаў на ўтрыманне дзяцей абавязанымі асобамі — адзін з важных кірункаў дзейнасці службы.

Паводле звестак Галоўнага ўпраўлення юстыцыі, усяго па аліментах спагнана 47,4 млн бел. рублёў. Гэта 95 % ад налічанай сумы, што амаль на 10 % вышэй за паказчык 2024 года. 

Да кожнага выпадку судовыя выканаўцы падыходзілі ў індывідуальным парадку, знаходзілі законныя дзейсныя меры для спагнання аліментаў.

Да прыкладу, жыхар Мазыра пасля разводу ўхіляўся ад паўнавартаснай выплаты аліментаў на сваё пяцігадовае дзіця. У Мазырскім міжраённым аддзеле прымусовага выканання завяршылі выканаўчую вытворчасць, дзе фігураваў гэты 41-гадовы мясцовы жыхар, які спрабаваў схаваць свае рэальныя даходы пры выплаце аліментаў. 

Мужчына рабіў выплаты, але па мінімальным тарыфе — як беспрацоўны. Гэта істотна памяншала памер аліментаў. Судовыя выканаўцы правялі праверку і ўстанавілі, што мазыранін атрымлівае рэгулярны даход, выязджаючы на заробкі ў Расію. «Па афіцыйным запыце службы работадаўца падаў пацвярджэнне аб працаўладкаванні мужчыны і звесткі аб яго рэальнай зарплаце. На падставе атрыманых даных судовыя выканаўцы зрабілі пераразлік аліментных абавязацельстваў. Запазычанасць, якая ўтварылася, склала 5 тыс. бел. руб. Аднак добраахвотна пагашаць доўг мужчына не спяшаўся. Тады была вынесена пастанова аб затрыманні і арышце аўтамабіля даўжніка. Такі паварот падзей аказаў імгненны эфект: рызыка пазбавіцца машыны матывавала мужчыну ў самыя кароткія тэрміны цалкам пагасіць запазычанасць перад сынам», — падкрэслілі ў Галоўным упраўленні юстыцыі.

Работа па спагнанні аліментаў працягваецца і сёлета. Акрамя таго, як было адзначана, з гэтага года ўступілі ў сілу змены ў заканадаўстве, якія прадугледжваюць новаўвядзенні і зручнасць для тых, хто атрымлівае аліменты або выплаты з Расіі. Цяпер спагнаннікам не трэба ехаць у суседнюю краіну і асабіста звяртацца ў фінансавыя ўстановы — сродкі можна пералічваць наўпрост на рахункі ў беларускіх банках.