Як адзначыў старшыня Гродзенскага аблвыканкама Юрый Караеў, Гродзенская вобласць дэманструе станоўчыя вынікі ў сферы эканамічнага развіцця. Асноўны паказчык — валавы рэгіянальны прадукт — склаў 12,6 млрд рублёў.
Гэта 100,9 % да ўзроўню аналагічнага перыяду 2024 года.
Аднак ёсць і сферы, якія патрабуюць увагі. Гэта развіццё прамысловасці, будаўніцтва і транспартнай інфраструктуры. Гэтыя кірункі патрабуюць кіраўніцкіх намаганняў і каардынацыі паміж рознымі ўзроўнямі ўлады.
— Спраўляемся ў цэлым добра, але ёсць такое паняцце, як эканамічная дысцыпліна. Паказчыкі павялічваюцца нераўнамерна. Па валавым рэгіянальным прадукце мы крыху не дасягнулі плана. Прычыны тлумачацца аб’ектыўна: сельскагаспадарчыя работы ў рэгіёне пачаліся пазней, чым звычайна, з-за неспрыяльных умоў надвор’я, што прывяло да меншых паказчыкаў ўраджайнасці і надояў малака. Аднак мы абавязкова збяром свае тоны, проста крыху пазней, — адзначыў губернатар.
Аднак, нягледзячы на цяжкасці, аграрны сектар дэманструе добрыя вынікі. Агульны аб’ём вырабленай прадукцыі дасягнуў 2,21 мільярда рублёў. У жывёлагадоўлі назіраецца ўпэўнены рост: выраблена 860 900 тон малака, што на 4,6 % вышэй за паказчык мінулага года. Сярэдні надой на адну карову павялічыўся на 137 кг. Па выніках першага паўгоддзя ён склаў 3926 кг. Вытворчасць мяса буйной рагатай жывёлы склала 66 000 тон — 100,6 % да аналагічнага перыяду мінулага года. Вытворчасць птушкі дасягнула 27 000 тон — 106,5 %. У раслінаводстве былі пашыраны пасяўныя плошчы пад цукровыя буракі, рапс, кукурузу і лён.
Прамысловасць рэгіёна таксама мае вялікія перспектывы для росту. Чакаецца, што паказчыкі павялічацца за кошт дыверсіфікацыі і пашырэння продажаў. Агульны аб’ём вытворчасці склаў 11,8 мільярда рублёў, што роўна 11,5 % ад усяго аб’ёму краіны. Прыкметна вырасла вытворчасць прадуктаў харчавання, напояў, драўляных і папяровых вырабаў, а таксама гумавых і пластыкавых тавараў. Рэгіён робіць стаўку не толькі на традыцыйныя прадукты харчавання, але і на шырокі асартымент прадукцыі.
Кіраўнік вобласці таксама адзначыў, што рост заработнай платы — важны паказчык дабрабыту насельніцтва. У рэгіёне назіраецца яе значны рост, яна павялічылася на 18,1 %. Юрый Караеў падкрэсліў важнасць падтрымкі росту заработнай платы, паколькі працоўныя рэсурсы маюць высокую каштоўнасць, і нельга дапускаць іх адток. Аднак, паводле яго слоў, гэта не павінна быць самамэтай, бо неабходна ўлічваць інвестыцыйныя праекты і ствараць высокапрадукцыйныя працоўныя месцы.
У эканоміцы рэгіёна занята каля 435 000 чалавек. Рынак працы дэманструе стабільнасць: колькасць вакансій павялічылася, а ўзровень беспрацоўя застаецца вельмі нізкі. Служба занятасці дапамагла знайсці працу амаль 10 тысячам чалавек, з якіх 2700 былі беспрацоўнымі.
Увага людзям
Юрый Караеў таксама падкрэсліў важнасць сацыяльнай скіраванасці палітыкі. Асноўны фокус — на падтрымку сельскіх жыхароў. Важна забяспечыць доступ да якасных тавараў і паслуг, а таксама стварыць умовы для замацавання маладых спецыялістаў у сельскіх раёнах.
— Жыхары сельскай мясцовасці — гэта тыя, хто ствараў нашу краіну, не думаючы аб матэрыяльнай узнагародзе нават у самыя складаныя часы. Сёння клопат аб іх становіцца ключавой задачай. І размова ідзе не толькі аб сельскагаспадарчых работах або перыядах збору ўраджаю. Падтрымка павінна быць пастаяннай: ад якасці работы магазінаў і медыцынскіх устаноў да стану дарог, дзіцячых садкоў і школ, — падкрэсліў Юрый Караеў.
У першым паўгоддзі ў эканоміку рэгіёна паступіла звыш 2,2 мільярда рублёў інвестыцый. Паступленні ў бюджэт перавысілі запланаваныя паказчыкі. Знешні гандаль таксама дэманструе станоўчую дынаміку: экспарт тавараў і паслуг перасягнуў імпарт, што забяспечыла рэгіёну дадатнае сальда.
Вераніка КАЗЛОЎСКАЯ
