Падчас надгляду аўтамабіля, якім кіравала грамадзянка Расіі, увагу супрацоўнікаў мытні прыцягнула кардонная ўпакоўка травянога чаю «RELAX SU KANAPIU LAPAIS». На этыкетцы было ўказана, што ў складзе прадукту прысутнічаюць лісце і суквецці канопляў.

Упакоўка была канфіскавана і накіравана ў Наваполацкі міжраённы аддзел Дзяржаўнага камітэта судовых экспертыз для правядзення спецыяльнай экспертызы. Вынікі паказалі, што чайныя сумесі ў фільтр-пакеціках, акрамя іншых кампанентаў, утрымліваюць марыхуану, якая, згодна з рэспубліканскім пералікам, з’яўляецца асабліва небяспечным наркатычным сродкам.

Мытныя органы папярэджваюць, што ўжыванне такога чаю можа выклікаць наркатычнае ап’яненне. За яго перавозку, набыццё або захоўванне на тэрыторыі Рэспублікі Беларусь прадугледжана крымінальная адказнасць.

Па дадзеным факце Віцебскай мытняй праводзіцца праверка.