Законапраект падрыхтаваны Міністэрствам унутраных спраў і прадугледжвае карэкціроўку закона № 122-З ад 4 студзеня 2014 года «Аб асновах дзейнасці па прафілактыцы правапарушэнняў» і Кодэкса Рэспублікі Беларусь аб адміністрацыйных правапарушэннях. 

Як растлумачыў міністр унутраных спраў Іван Кубракоў, гэты праект накіраваны на ўдасканаленне прававога рэгулявання прафілактычнай работы ў дачыненні да асоб, якія ўчынілі хатні гвалт, і прапануе карэкціроўку закона шляхам пашырэння пераліку падстаў для ажыццяўлення прафілактычнага ўліку. Для гэтага прапануецца ўскласці на органы ўнутраных спраў ажыццяўленне прафілактычнага ўліку ў дачыненні да дзвюх новых катэгорый асоб, а менавіта: тых, хто спыніў знаходжанне ў ЛПП; асуджаных да пакарання ў выглядзе штрафу. 

Прапанавана змяніць падставы для прафілактычнага ўліку ў дачыненні да грамадзян, якія ўчынілі хатні гвалт. «Так, пастаноўка на ўлік хатніх скандалістаў будзе ажыццяўляцца за ўчыненне двух правапарушэнняў на працягу аднаго года незалежна ад таго, прыцягнутая асоба да адміністрацыйнай адказнасці альбо справа спыненая ў судзе ў сувязі з прымірэннем з пацярпелым», — адзначыў міністр.

Плануецца змяніць і дапоўніць пералік асноўных прафілактычных мерапрыемстваў па папярэджанні хатняга гвалту, канкрэтызаваць функцыі і абавязкі суб’ектаў прафілактыкі гэтай сферы. 

У прыватнасці, пры рабоце з падуліковымі прадугледжваецца пашырэнне паўнамоцтваў наступных суб’ектаў прафілактыкі: органаў па працы, занятасці і сацыяльнай абароне — у частцы правядзення мерапрыемстваў па працаўладкаванні непрацуючых; дзяржаўных арганізацый аховы здароўя — у частцы аказання медыцынскай дапамогі асобам, якія стаяць на ўліку ва ўрача-псіхіятра-нарколага; органаў кіравання адукацыяй, устаноў адукацыі — у частцы правядзення сацыяльнага расследавання, устанаўлення наяўнасці крытэрыяў і паказчыкаў сацыяльна небяспечнага становішча, арганізацыі па месцы работы — у частцы разгляду паводзін падуліковых у калектыве. 

Акрамя таго, праектам закона ўстанаўліваюцца крытэрыі для датэрміновага спынення прафілактычнага ўліку. У гэтай сувязі кіраўнік тэрытарыяльнага органа ўнутраных спраў зможа прыняць такое рашэнне не раней, чым праз 6 месяцаў з дня пастаноўкі на ўлік і пры наяўнасці наступных падстаў: працоўная занятасць на працягу паўгода, адсутнасць фактаў здзяйснення хатняга гвалту, праходжанне карэкцыйнай праграмы, а таксама згода пацярпелага.