«Міжрэгіянальнае супрацоўніцтва стварае трывалы фундамент далейшага будаўніцтва Саюзнай дзяржавы і ўмацавання нашай інтэграцыі. Мы павінны гэта ўсведамляць і вельмі актыўна рухацца ў такім напрамку. Асабліва гэта важна ў няпросты час, у якім мы жывём», — сказала Валянціна Матвіенка.

Яна падкрэсліла, што да Форуму рэгіёнаў і на яго пляцоўках было падпісана 323 дакументы аб супрацоўніцтве, што сведчыць аб рэзультатыўнасці такога фармату работы. Таксама Валянціна Матвіенка адзначыла, што кааперацыя паміж краінамі з кожным годам становіцца ўсё глыбейшай. Пры гэтым патэнцыял у такім напрамку яшчэ далёка не вычарпаны.

Старшыня Савета Федэрацыі заклікала ўдзельнікаў сустрэчы адкрыта пагаварыць аб тых пытаннях, якія стрымліваюць развіццё супрацоўніцтва паміж дзвюма краінамі. Пры гэтым яна прапанавала зрабіць акцэнт на тых праектах, якія будуць ствараць нешта новае, апераджальнае, а не толькі імпартазамяшчальную прадукцыю. «З такімі разумнымі людзьмі, якія ёсць у Расіі і Беларусі, мы можам быць наперадзе планеты ўсёй. Калі не будзе сучаснай эканомікі, то ў нас не будзе ні моцнай сацыяльнай абароны, ні сучасных рабочых месцаў», — падкрэсліла Валянціна Матвіенка.