Паводле папярэдняй інфармацыі, у суботу каля 2.40 на аўтадарозе М1 Брэст — Мінск — мяжа Расійскай Федэрацыі 43-гадовы кіроўца аўтобуса, які рухаўся з Мінска, не справіўся з кіраваннем, з’ехаў у кювет і перакуліўся. У салоне знаходзіліся два кіроўцы і 12 пасажыраў.

У выніку ДТЗ 53-гадовая жанчына загінула, шэсць чалавек шпіталізаваны.

На месцы здарэння працавалі групы ДАІ, МНС, медыкі і следча-аператыўная група.

Рэспубліканскі цэнтр арганізацыі медыцынскага рэагавання Міністэрства аховы здароўя паведаміў, што на месца здарэння былі накіраваныя брыгады інтэнсіўнай тэрапіі, фельчарскія і рэанімацыйныя брыгады. Адна з пасажырак памерла на месцы здарэння.

«13 чалавек дастаўлены спецыялістамі васьмі брыгад хуткай медыцынскай дапамогі ў Талачынскую ЦРБ і Аршанскую гарадскую бальніцу № 1. Трое пацыентаў у Талачынскай ЦРБ пасля агляду спецыялістамі былі накіраваныя на амбулаторнае лячэнне. Пацыентам, шпіталізаваным у Аршанскую бальніцу, правялі неабходныя дыягнастычныя даследаванні. Цяпер чатыры чалавекі шпіталізаваныя ў хірургічнае аддзяленне, пяць — у траўматалагічнае, адзін — у рэанімацыйнае. У пацыентаў дыягнаставаны траўмы рознай ступені цяжкасці. Сітуацыя знаходзіцца на кантролі Міністэрства аховы здароўя», — праінфармавалі ў ведамстве.