З Чалябінска падапечныя Дзмітрыя Квартальнава перабраліся ў Маскву, дзе «зуброў» рыхтуецца сустрэць ЦСКА. 4 студзеня мінчане саступілі «Трактару» з лікам 4:5, у той час як «армейцы» ў серыі булітаў прайгралі «Лакаматыву» (1:2). На хатняй пляцоўцы маскоўскі клуб набірае ачкі на працягу сямі матчаў запар, у табліцы канферэнцыі ЦСКА ідзе шостым з 48 баламі. У «Дынама» на 9 пунктаў больш і трэцяя пазіцыя на Захадзе.

«На апошняй трэніроўцы мы папрацавалі над рэчамі, якія ў нас не атрымаліся ў мінулым паядынку. Тады мы не паказалі, на што здольныя, сёння трэба нагнаць упушчанае. З нецярпеннем чакаем матч, — сказаў абаронца „зуброў“ Нікалас Мелаш. — ЦСКА — добрая каманда, яны выдатна гуляюць у цела. Нам трэба дзейнічаць па нашай сістэме і даваць адпор. Думаю, усё будзе добра».

У бягучым сезоне «Дынама» і ЦСКА сустракаліся ўжо тройчы, і кожны раз пераможцам у гэтай пары аказаўся гаспадар лёду. 20 кастрычніка ў Маскве мацнейшымі былі «армейцы» (5:3), 3 і 20 лістапада ў «Мінск-Арэне» поспех святкавалі «бела-блакітныя» (2:0 і 5:2). Чацвёрты і заключны паядынак каманд у цяперашнім рэгулярным чэмпіянаце стартуе ў 17.00.