Мінскае «Дынама» і яшчэ сем каманд прымуць удзел у перадсезонным хакейным турніры «Кубак мэра Масквы», паведамілі БелТА у прэс-службе сталічнага клуба.
Трафей разыграюць восем каманд, якія падзелены на дзве групы. У квартэт «А» увайшлі мінскае «Дынама», маскоўскія ЦСКА і «Спартак», а таксама казанскі «Ак Барс». Пул «Б» склалі дынамаўцы з Масквы, ніжагародскае «Тарпеда», «Шанхайскія Драконы» і «Аўтамабіліст» з Екацярынбурга. Турнір стартуе 27 жніўня, фінал адбудзецца 30 жніўня.
У мінулым годзе «зубры» дайшлі да вырашальнага матчу, дзе ўступілі ЦСКА. Кубак мэра Масквы — традыцыйны таварыскі турнір, які праводзіцца незадоўга да пачатку новага сезона Кантынентальнай хакейнай лігі. У гэтым годзе рэгулярны чэмпіянат возьме старт 5 верасня.
