У пятніцу эстафету форуму кансалідацыі патрыятычных сіл прымала беларуская сталіца. Гэтым разам маштабная акцыя аб’яднала амаль 800 прадстаўнікоў студэнцкай моладзі і працоўных калектываў, якія сабраліся ў БДМУ. У фармаце адкрытага дыялога запрошаныя эксперты падзяліліся з прысутнымі тым, якой яны бачаць Беларусь у будучыні, а таксама стратэгіямі развіцця, па якіх павінна рухацца краіна.

Да пачатку сустрэчы госці і ўдзельнікі маглі азнаёміцца з выставай дасягненняў Мінска, а таксама фотавыставай «Мы дасягнулі гэтага разам», на якой прадстаўлены знакавыя аб’екты сталіцы, якія пабудаваны (рэканструяваны) за апошнія 15 гадоў.

Тэма дыялогавай пляцоўкі — «Беларусь: стратэгія будучыні». «Які вобраз будучыні Беларусі?», «Куды мы рухаемся?», «Якой будзе медыцына будучыні?». Гэтыя і іншыя пытанні былі ў цэнтры ўвагі ўдзельнікаў мерапрыемства. Варта адзначыць, што сёлета акцыя праводзіцца з выкарыстаннем новых тэхналогій — чат-ботаў, дзякуючы якім удзельнікі дыялогавай пляцоўкі могуць задаць экспертам самыя розныя пытанні.

«Хто сабой уяўляе Беларусь будучыні?»

Пачатак адкрытаму дыялогу даў старшыня Мінскага гарадскога Савета дэпутатаў Арцём Цуран. Ён адзначыў, што акцыя «Беларусь адзіная» праходзіць ужо не першы год, але кожны раз перад аўдыторыяй стаіць пэўнае пытанне. Сёння яно датычыцца будучыні Беларусі. «Што такое Беларусь будучыні? А самае галоўнае — хто сабой уяўляе Беларусь будучыні? Яны перад намі. Гэта будучыя настаўнікі, урачы, кіраўнікі, маладыя дэпутаты, праграмісты, будаўнікі. Гэта наша моладзь, якой трэба будзе будаваць нашу Беларусь і вырашаць, якой яна будзе. Але вырашаць мы павінны разам. Менавіта таму праводзім такія сустрэчы напярэдадні Дня народнага адзінства, дзяржаўных і іншых святаў».

• Паводле слоў кіраўніка дэпутацкага корпуса сталіцы, сутнасць такіх сустрэч адна — вызначыцца, як мы будзем жыць далей, як будзем будаваць нашу краіну: «Сваю працоўную дзейнасць я пачынаў настаўнікам, працаваў і інструктарам на заводзе. І ўжо тады зразумеў, што дзяржава — гэта не законы, графікі і справаздачы. Гэта людзі з іх марамі, спадзяваннямі, справамі і планамі. І ад таго, якія планы будуць у людзей, будзе залежаць і развіццё краіны. І тут важна разумець, што ў дзяржавы, улады ёсць свае задачы — забеспячэнне бяспекі, развіццё краіны, забеспячэнне стабільнасці. У грамадства, у сваю чаргу, ёсць свае запыты — прызнанне, магчымасць росту і іншыя. Як мы гэтыя паняцці будзем спалучаць, так і будзем развівацца».

Арцём Цуран падкрэсліў, што ў нашай краіне ў вызначальны момант дзякуючы нацыянальнаму лідару Аляксандру Лукашэнку ўдалося зрабіць усё для таго, каб развівалася і грамадства, і асобна ўзяты малады чалавек, і не толькі маладыя людзі: «Сёння вельмі важна зразумець, як мы будзем будаваць жыццё далей. Якой будзе наша Беларусь праз 5, 10, 30 гадоў? А можа, мы збярэмся на гэтую акцыю праз 5 гадоў і будзем казаць пра тое, што зрабілі, а што не зрабілі і чаму нешта не ўдалося. І я ўпэўнены, што адказы на гэтыя пытанні не павінны быць стандартнымі. Яны павінны быць шчырымі. І самае галоўнае — чалавек павінен зразумець, якая мэта перад ім стаіць і як ён яе будзе здзяйсняць».

«Лячыць не толькі цела, але і душу»

Сярод запрошаных экспертаў — Генеральны Сакратар Беларускага Чырвонага Крыжа, намеснік старшыні Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзёжнай палітыцы Дзмітрый Шаўцоў. Ён падзяліўся з аўдыторыяй, якой ён бачыць медыцыну будучыні: «Вельмі складана спрагназаваць, якой будзе наша краіна праз 5, 10, 30 гадоў, таму што мы бачым, наколькі хутка развіваецца свет, наколькі хутка ідуць тыя тэндэнцыі, якія яшчэ зусім нядаўна былі з вобласці фантазіі. І будучым урачам, і будучай медыцыне прыйдзецца сутыкацца не толькі з пытаннямі лячэння розных захворванняў. Я думаю, што праз 5 гадоў мы навучымся лячыць тыя захворванні, якія сёння з’яўляюцца невылечнымі. Пры гэтым будучым урачам прыйдзецца сутыкнуцца яшчэ і з зусім іншымі выклікамі, а іх вельмі шмат». 

Хто мог выказаць здагадку яшчэ некалькі гадоў таму назад, што штучны інтэлект паглыне ўжо многія навукі? «І медыцына ў тым ліку будзе інтэграваная са штучным інтэлектам. За гэтым будучыня. Але мы павінны разумець, што частка асноўных функцый, такіх як прыняцце рашэнняў, логіка сваіх высноў, прыняцце неардынарных рашэнняў у лячэнні тых ці іншых захворванняў мы не можам перакласці на штучны інтэлект. Мы павінны разумець, што гэта будзе выключнай прэрагатывай урача будучыні. Будучыні агляднай, паколькі мы разумеем, наколькі хутка змяняюцца тэндэнцыі ў сістэме аховы здароўя ўсіх краін свету. Штогод з’яўляюцца новыя схемы лячэння, новыя дыягностыкі. І наша краіна ганарыцца тым, што ў нас адна з самых перадавых сістэм аховы здароўя ў свеце. Мы здольныя забяспечваць лячэнне ўсіх пацыентаў, усіх грамадзян на розным узроўні, і любому чалавеку гэтая медыцына даступная. Самае галоўнае — мы не павінны згубіцца ў электронным патоку ведаў. Мы павінны разумець, што, як казаў яшчэ Гіпакрат, мы павінны лячыць не толькі цела, але і душу». 

Паводле яго слоў наша сістэма аховы здароўя вырабляе самы галоўны прадукт у свеце — здароўе: «Таму што калі будзе здаровы чалавек, калі будзе здаровая нацыя, яна зможа развівацца і эканамічна, і палітычна, і стратэгічна. Таму менавіта ад вас, будучых медыкаў, залежыць тое, якой будзе наша нацыя і як яна будзе развівацца».

«Нацыя павінна быць здаровай і фізічна моцнай»

У Беларусі стратэгія развіцця краіны распрацоўваецца на гады наперад, звяртаючыся да прысутных, заявіла беларуская лёгкаатлетка, член Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзёжнай палітыцы Анастасія Мірончык-Іванова: «Мне б хацелася сёння разам з вамі задацца пытаннем, у якім кірунку мы рухаемся і што нам трэба для паспяховага жыцця. На маю думку, наша нацыя павінна быць здаровай і фізічна моцнай. Гэта звязана шмат у чым з тэмпам і рытмам сучаснага жыцця. Але я ўпэўнена: наперадзе нас чакае здаровая нацыя. Звярніце ўвагу: у краіне ўведзены ў эксплуатацыю больш за 34 тысячы спартыўна-аздараўленчых аб’ектаў. Спартсмены на Алімпійскіх гульнях у 2024 годзе змаглі праявіць сябе нават ва ўмовах такой складанай Алімпіяды і заваяваць 4 алімпійскія ўзнагароды».

Парламентарый падкрэсліла: «У будучыні ўсе мы ўбачым беларускі спорт ва ўсім росквіце, прычым у горадзе Мінску. Ды і ўсю нашу квітнеючую краіну». Яна шчыра расказала студэнтам, што і сама збіралася ўдзельнічаць у мінулых Алімпійскіх гульнях: «Але, калі я даведалася, што наша краіна будзе выступаць пад нейтральным статусам, імгненна прыняла рашэнне адмовіцца ад удзелу ў гэтых гульнях. Дзе не шануюць менавіта спартыўныя каштоўнасці, а прыплятаюць і палітыку, і чужыя нашай дзяржаве каштоўнасці. Вельмі важна, каб беларускія спартсмены выступалі пад сваімі нацыянальнымі сімваламі. Калі гучыць наш гімн, калі падымаецца наш сцяг — гэта вельмі важна. Але я ўпэўнена, што ў нас будзе свой алімпійскі рух і сумленная спартыўная барацьба»

Паводле слоў вядомай спартсменкі, менавіта з нацыянальнай сімволікай і правільнымі традыцыямі ў нас будзе выдатная здаровая краіна: «І менавіта вы прыкладзеце ўсе намаганні для раскрыцця свайго патэнцыялу і рэалізацыі новых праектаў. Таму толькі наперад! Дзе адзінства, там заўсёды перамога».

Уцэнтры ўвагі — чалавек, яго жыццё, ідэі і каштоўнасці

У сваю чаргу член Пастаяннай камісіі Палаты прадстаўнікоў па міжнародных справах Аляксандр Шпакоўскі падзяліўся з прысутным сваім ідэальным бачаннем будучыні нашай краіны ў перспектыве 5-10 гадоў: «Ва ўнутранай палітыцы Беларусь застанецца стабільнай, бяспечнай, суверэннай, сацыяльна арыентаванай дзяржавай. Уладу ў нашай краіне захаваюць патрыятычныя сілы, якія будуць засноўваць сваю палітыку на тых каштоўнасцях, зададзеных Прэзідэнтам Аляксандрам Рыгоравічам Лукашэнкам».

Гаворачы аб эканоміцы будучыні, парламентарый адзначыў будаўніцтва другой АЭС: «Пры гэтым доля электратранспарту павялічыцца да 50 % ад усёй колькасці аўтамабільных сродкаў пасажырскага транспарту, якія ёсць у нашай краіне. Электратранспарт стане рэальнасцю не толькі для горада Мінска. Па ўсёй краіне будзе створана развітая сетка электрычных заправачных станцый. ВУП Беларусі павялічыцца да 100 мільярдаў рублёў, а адзін рубель будзе эквівалентны аднаму долару». 

• У знешняй палітыцы Беларусь застанецца суверэнным, упэўненным членам міжнароднай супольнасці. «Уплыў арганізацый, у якія ўваходзіць наша краіна, інтэграцыйных блокаў, такіх як ЕАЭС, ШАС няўхільна ўзрастае і на працягу 5-10 гадоў дасягае свайго апагею. Саюзная дзяржава Расіі і Беларусі будзе развівацца як цесны ваенна-палітычны і эканамічны альянс дзвюх суверэнных краін. Мы захаваем вельмі блізкія саюзніцкія адносіны з Расіяй, але разам з тым гэта будуць адносіны дзвюх незалежных дзяржаў», — падкрэслівае Аляксандр Шпакоўскі.

Закранаючы вобласць навукова-тэхнічнага прагрэсу, парламентарый адзначыў: «Будзем абапірацца на КНР і яе дасягненні ў гэтай сферы. У беларусаў атрымаецца паставіць на службу штучны інтэлект, але ў цэнтры ўвагі ўсё роўна застанецца чалавек, яго жыццё, ідэі і каштоўнасці. Будзе развівацца і інфраструктура. У Мінску запусціцца чацвёртая лінія метрапалітэна. Гэта ўсё вельмі добрыя пажаданні, і, будучы рэалістам, я разумею, што гэта ідэальная карціна развіцця нашай краіны. Для таго каб дамагчыся такіх вынікаў, нешта можна зрабіць ужо бягучымі тэмпамі, таму што нельга сказаць, што мы ідзём па няслушнай траекторыі. Можа быць, варта павялічыць тэмп, але чагосьці мы даможамся і ў рамках бягучай хуткасці. Для чагосьці неабходна будзе рабіць каласальную працу. Гэта наша сумесная задача. Вы разумееце, што цяпер асноўнае пытанне — пераход да шостага тэхналагічнага ўкладу. Калі мы здолеем гэта зрабіць, значыць, апынемся ў авангардзе чалавечага прагрэсу. Не здолеем — значыць, апынемся на перыферыі развіцця». 

Аляксандр Шпакоўскі заключыў: «Нам усім трэба сур’ёзна папрацаваць у будучыні над дыверсіфікацыяй экспарту, у тым ліку медыцынскіх паслуг, і над прадукцыйнасцю працы. Мы вельмі на вас разлічваем. Мы ўсе гатовыя ў гэтым плане працаваць разам з вамі. Ёсць такі армейскі прынцып: „Не рабі, як я сказаў — рабі, як я“. Рабіце, як наш Прэзідэнт. І ў гэтай сітуацыі, мне здаецца, мы не памылімся. І ідэальная карціна, абмаляваная мной першапачаткова, цалкам можа стаць рэальнасцю».

Данііл ХМЯЛЬНІЦКІ

Фота Віктара ІВАНЧЫКАВА