Бакі абмеркавалі ключавыя напрамкі гандлёва-эканамічнага і інвестыцыйнага супрацоўніцтва, падыходы да прагназавання сацыяльна-эканамічнага развіцця, а таксама шэраг іншых пытанняў, паведамілі ў прэс-службе Мінэканомікі. 

На думку Юрыя Чабатара, ва ўмовах знешняй нявызначанасці ўстойлівасць нашых эканомік напрамую залежыць ад здольнасці гнутка і эфектыўна рэагаваць на выклікі.

— Сёння Беларусь сумесна з расійскімі партнёрамі фарміруе архітэктуру стратэгічнага ўзаемадзеяння, якая ахоплівае ўсе ключавыя сферы. Наша мэта — стварыць трывалую аснову для ўстойлівага і паступальнага развіцця. Над гэтым актыўна працуюць каманды міністэрстваў, фарміруючы выніковы прагноз сацыяльна-эканамічнага развіцця Саюзнай дзяржавы на найбліжэйшыя тры гады, — адзначыў міністр эканомікі.

Не менш важны пункт парадку дня — праект эканамічнай мадэлі Саюзнай дзяржавы на 2027-2030 гады, каардынатарамі работы над якім таксама выступаюць эканамічныя ведамствы дзвюх краін. Дакумент канкрэтызуе сферы двухбаковага супрацоўніцтва, якія дадуць дадатковыя эфекты ад саюзнай інтэграцыі.

Асаблівую ўвагу кіраўнікі міністэрстваў ўдзялілі развіццю турыстычнай галіны. Абмяркоўваліся практычныя крокі па стымуляванні далейшага росту ўзаемнага турпатоку.

— Узаемны турыстычны паток з году ў год павялічваецца. У 2024 годзе Беларусь прыняла больш за 350 тысяч расійскіх турыстаў, што на 59 % больш, чым у 2023-м. Расце цікавасць беларускіх грамадзян да падарожжаў па Расіі: турпаток павялічыўся на 78 % у параўнанні з 2023 годам. Гэта пацвярджае высокі патэнцыял галіны, і мы бачым вялікія перспектывы ў стварэнні сумесных турыстычных брэндаў і маршрутаў, — адзначыў Юрый Чабатар.

Максім Рашэтнікаў адзначыў важнасць стварэння турыстычнага інфармацыйнага цэнтра Саюзнай дзяржавы ў Смаленскай вобласці: 

— Цэнтр дазволіць нам зладжана развіваць турыстычны патэнцыял Саюзнай дзяржавы, спрыяючы стварэнню «саюзнага» турпрадукту і яго прасоўванню.

Па выніках сустрэчы дасягнута дамоўленасць аб правядзенні чарговага сумеснага пасяджэння калегій міністэрстваў у кастрычніку-лістападзе бягучага года, дзе агучаныя тэмы будуць абмеркаваны больш дэталёва, з акцэнтам на канкрэтных мерах па ўмацаванні ўзаемадзеяння.