У прыватнасці, у новай рэдакцыі выкладзена інструкцыя аб парадку правядзення Нацыянальнага тэлевізійнага конкурсу «Тэлевяршыня», зацверджаная пастановай Міністэрства інфармацыі ад 27 красавіка 2022 года нумар 10. Дакументам вызначаны парадак арганізацыі і правядзення конкурсу, выяўлення яго лаўрэатаў (прэтэндэнтаў на перамогу) і пераможцаў, парадак іх узнагароджання. Адзначана, што мерапрыемства накіравана на садзейнічанне развіццю нацыянальных тэлевізійных СМІ, фарміраванне паўнацэннай інфармацыйнай прасторы краіны, павышэнне прафесійнага ўзроўню журналістаў і работнікаў іншых прафесій, занятых у вытворчасці тэлепраграм.
Гэта адкрыты конкурс. Ён праводзіцца не радзей як адзін раз у два гады. Яго арганізатарамі выступаюць Міністэрства інфармацыі, Нацыянальная дзяржаўная тэлерадыёкампанія Рэспублікі Беларусь, ЗАТ «Другі нацыянальны тэлеканал» і ЗАТ «Сталічнае тэлебачанне».
Інфармацыя аб яго правядзенні размяшчаецца на афіцыйным сайце Мінінфарма не пазней за тры каляндарныя дні пасля вызначэння аргкамітэтам тэрмінаў мерапрыемства. Удзельнічаць могуць юрыдычныя асобы, на якіх ускладзены функцыі рэдакцый тэлевізійных СМІ, зарэгістраваных у Беларусі, або тэлевізійных СМІ, заснавальнікамі якіх з’яўляюцца замежныя дзяржавы сумесна з Рэспублікай Беларусь, а таксама асобныя работнікі па прадстаўленні рэдакцый тэлепраграм у адпаведнасці з намінацыямі конкурсу.
На конкурс прымаюцца тэлеперадачы (матэрыялы), якія выйшлі ў эфір на працягу аднаго года або двух гадоў, што папярэднічаюць году правядзення конкурсу. Тэрмін прадстаўлення дакументаў і запісаў матэрыялаў — не пазней як за 20 дзён да даты правядзення конкурсу.
Дазволена вылучаць неабмежаваную колькасць тэлеперадач у кожную намінацыю конкурсу. Адну і тую ж тэлеперадачу можна прадстаўляць у розных намінацыях. Калі матэрыялы створаны на замежных мовах, то яны павінны мець субцітры або сінхронны пераклад на рускую ці беларускую мову.
Таксама прававым актам унесены змяненні ў палажэнне аб Нацыянальным конкурсе «РадыёТрыумф», зацверджанае пастановай Міністэрства інфармацыі ад 23 ліпеня 2025 года нумар 8.
У прыватнасці, замацавана, што да ўдзелу ў конкурсе дапускаюцца юрыдычныя асобы, на якія ўскладзены функцыі рэдакцый радыёпраграм, зарэгістраваных у Беларусі, што з’яўляюцца членамі ГА «Асацыяцыя індустрыі радыёвяшчання», а таксама асобныя работнікі ў адпаведнасці з намінацыямі конкурсу. Таксама ўдакладняецца, што заяўнікі могуць вылучаць у кожную намінацыю конкурсу не больш за адну радыёперадачу ад кожнай радыёпраграмы. Акрамя таго, скарэкціраваны пералік дакументаў, якія неабходна прадаставіць для ўдзелу ў конкурсе.
Пастанова ўступае ў сілу з 4 лютага.
