Упраўленне кантролю за замежнымі актывамі Мінфіна ЗША 15 снежня апублікавала ліцэнзію, якая афіцыйна дазваляе фінансавыя аперацыі, звязаныя з беларускімі калійнымі ўгнаеннямі. Адпаведны дакумент размешчаны на сайце амерыканскага Мінфіна. Паведаміла БелТА.
Генеральная ліцэнзія дазваляе транзакцыі з «Беларуськаліем», Беларускай калійнай кампаніяй (БКК), даччынай структурай БКК ва Украіне «Агророзквіт». Дакумент таксама дазваляе аперацыі з усімі юрыдычнымі асобамі, дзе вышэйпералічаныя кампаніі валодаюць доляй у памеры 50 % або больш.
Спецпасланнік ЗША па Беларусі Джон Коўл 13 снежня на перагаворах з Прэзідэнтам Беларусі Аляксандрам Лукашэнкам у Мінску паведаміў, што Злучаныя Штаты здымаюць санкцыі з беларускага калію. Адпаведныя ўказанні, з яго слоў, даў амерыканскі лідар Дональд Трамп. Коўл адзначыў, што зносіны на тэму санкцый паміж Мінскам і Вашынгтонам будуць працягвацца і далей.
