Як адзначыў спікер, да правядзення свята, як і летась, падрыхтаваны метадычныя рэкамендацыі. У іх вызначаны асноўныя падыходы і напрамкі арганізацыі выпускных вечароў — ад сцэнарных рашэнняў да ўсіх неабходных арганізацыйных пытанняў.

— Асноўнай пляцоўкай для правядзення выпускных традыцыйна стануць школы. Разам з тым, калі магчымасці ўстановы абмежаваныя — напрыклад, з-за вялікай колькасці выпускнікоў або асаблівасцяў забудовы, — мерапрыемства можа быць перанесена ў сацыякультурныя ўстановы. Гаворка ідзе пра тэатры, кінатэатры, дамы культуры і цэнтры творчасці. Такое рашэнне прымаецца па ўзгадненні з мясцовымі выканаўчымі органамі, — удакладняе Віктар Доўнар.

У Міністэрстве адукацыі падкрэсліваюць, што выпускны вечар застаецца перш за ўсё святам для дзяцей. У яго праграме прадугледжаны ўрачыстая частка і традыцыйны забаўляльны блок — дыскатэка, конкурсы і іншыя актыўнасці. Арганізацыю мерапрыемстваў забяспечваюць установы адукацыі пры падтрымцы бацькоў.

Таксама ў рамках свята можа праводзіцца сустрэча світанку — як сімвал уступлення выпускнікоў у дарослае жыццё.

— Асаблівая ўвага будзе нададзена пытанням бяспекі. Яе забяспечаць сумесна з праваахоўнымі органамі і супрацоўнікамі МНС, — робіць акцэнт спікер. — Захоўваецца і тэндэнцыя правядзення адзіных выпускных у рамках раёна або горада. Летась такі фармат быў упершыню апрабаваны ў Заводскім раёне Мінска, а сёлета плануецца правядзенне агульнагарадскіх мерапрыемстваў па раёнах сталіцы. Маштабныя гарадскія выпускныя праходзяць і ў рэгіёнах.

У 2026 годзе школы заканчваюць 58 884 адзінаццацікласнікі. У ведамстве адзначаюць: усё робіцца для таго, каб гэты дзень надоўга застаўся ў памяці выпускнікоў.