У палажэнні аб мэтавай падрыхтоўцы спецыялістаў, рабочых, служачых прадугледжваюцца навацыі. Права заказу на мэтавую падрыхтоўку прадастаўлена дзяржаўным органам, дзяржаўным арганізацыям і арганізацыям з доляй уласнасці дзяржавы ў іх статутных фондах не менш як 50 працэнтаў, а таксама іншым арганізацыям, якія ўнеслі значны ўклад у развіццё рэгіёна і маюць хадайніцтва адпаведнага аблвыканкама (Мінскага гарвыканкама).

Уведзены дадатковыя патрабаванні да арганізацый — заказчыкаў мэтавай падрыхтоўкі. У прыватнасці, абавязак абгрунтавання неабходнасці падрыхтоўкі спецыяліста на ўмовах мэтавай падрыхтоўкі. Абавязковая наяўнасць конкурсу сярод абітурыентаў, якія ўдзельнічаюць у конкурсе на мэтавую падрыхтоўку, як на этапе падачы дакументаў, так і пры падвядзенні вынікаў здачы ўнутраных уступных іспытаў у ВНУ.

Устаноўлена адказнасць абітурыента, які заключыў дагавор аб мэтавай падрыхтоўцы, і заказчыка ў выпадку неабгрунтаванага скасавання або невыканання ўмоў дагавора. Удакладнены тэрміны падачы заявак на мэтавую падрыхтоўку і іх формы.

Акрамя гэтага, уносяцца змяненні ў палажэнне аб дзяржаўнай акрэдытацыі. Яны прадугледжваюць перавод адміністрацыйных працэдур дзяржаўнай акрэдытацыі (альбо яе пацвярджэння) у сферы адукацыі ў электронны выгляд. Устаноўлена абавязковасць уключэння прадстаўнікоў заказчыкаў кадраў у склад камісіі, якая праводзіць дзяржаўную акрэдытацыю. Скарэкціраваны крытэрый ацэнкі адпаведнасці заяўленаму віду ўстановы вышэйшай адукацыі ў частцы павышэння долі аступененага прафесарска-выкладчыцкага складу (з 40 працэнтаў да 45 працэнтаў).

«Для прадастаўлення магчымасці ВНУ забяспечыць выкананне такога крытэрыю гэта норма ўступіць у сілу з 1 верасня 2030 года», — адзначылі ў прэс-службе.