Удыхнуць у вёску новае жыццё
Каментуючы выступленне Аляксандра Лукашэнкі на нарадзе ў Віцебску, член Пастаяннай камісіі Савета Рэспублікі па заканадаўстве і дзяржаўным будаўніцтве Людміла Сапега адзначае, што Прэзідэнт невыпадкова галоўнай сваёй мэтай пазначыў захаванне вёскі, як фундаментальнай асновы існавання беларускай дзяржавы.
— Сучасная вёска ў жыцці краіны адыгрывае не толькі выключна эканамічную ролю, як цэнтр аграпрамысловай вытворчасці і сродак забеспячэння харчовай бяспекі краіны, — кажа сенатар. — Калі кінуць погляд на некалькі дзесяцігоддзяў таму, то карані пераважнай колькасці беларусаў дагэтуль знаходзяцца ў сельскай мясцовасці. А гэта захаванне нашых культурных і сямейных традыцый, звычаяў і багатай гістарычнай спадчыны — усяго таго, што аб’ядноўвае нас, як адзіны народ.
На думку сенатара, паўсюдная урбанізацыя, якую мы перажываем у апошнія гады, можа пры няправільным падыходзе прывесці не толькі да страты гэтых спецыфічных нацыянальных рыс, але і да пэўнай няроўнасці ва ўмовах пражывання паміж гарадскімі і сельскімі жыхарамі, стварэння сацыяльнай напружанасці ў грамадстве:
— Менавіта таму Аляксандр Лукашэнка справядліва патрабуе ўдыхнуць у сучасную беларускую вёску новае жыццё, зрабіць яе бацькоўскім домам для значнай часткі насельніцтва краіны. Што, на думку Кіраўніка дзяржавы, немагчыма зрабіць без стварэння спрыяльнага асяроддзя для пражывання сельскіх жыхароў: арганізацыі высокапрадукцыйных рабочых месцаў, забеспячэння жыллём, доступу да параўнальных з гарадскімі магчымасцямі аховы здароўя, адукацыі, культуры і спорту.
Эфектыўнасць — у цэнтры ўвагі
Палітолаг Вадзім Баравік у ток-шоу «Будні» на «Альфа Радыё» звярнуў увагу на характар нарады:
— Глыбокая, жорсткая размова Кіраўніка дзяржавы з актывам у Віцебску абумоўленая перш за ўсё тым, што, на жаль, асобныя кіраўнікі падаюць не заўсёды дакладныя статыстычныя даныя і не выконваюць шэраг прагнозных паказчыкаў, а часам выконваюць іх не ў поўнай меры. І мы гэта бачым не толькі ў Віцебскай вобласці, але і па шэрагу кірункаў у іншых рэгіёнах краіны. Прэзідэнт зрабіў высновы пасля глыбокага аналізу — і яго незадаволенасць вынікамі абсалютна абгрунтавана. Сёння Беларусь вядзе знешні гандаль ва ўмовах жорсткага знешняга ціску, санкцый, але пры гэтым дэманструе цалкам нядрэнныя паказчыкі. Мы здольныя працаваць у тым ліку ў складаных геапалітычных умовах. Але мы павінны дакладна разумець, што вакол Беларусі цяпер складаная ваенна-палітычная сітуацыя. Як Аляксандр Лукашэнка абсалютна дакладна падкрэсліў, калі мы хочам працаваць на трактары або ў сваім кабінеце, (а не ваяваць. — Заўв. рэд.), то трэба адказна ставіцца да выканання службовых абавязкаў, не дапускаць халатнасці і забяспечваць належны ўзровень дысцыпліны. Патрабаванні Прэзідэнта вельмі своечасовыя, і мы павінны на гэта абапірацца.
Палітолаг канстатаваў, што на нарадзе ў Віцебску гаварылася не толькі аб праблемах, але і аб поспехах, аднак пазітыўны вопыт — гэта таксама падстава задумацца аб тым, хто дзе недапрацоўвае:
— Беларускі лідар, звяртаючыся да кіраўнікоў, задаў абсалютна заканамернае пытанне: чаму вы, умоўна кажучы, можаце добра працаваць па цэлым шэрагу кіраўнікоў, а таксама (паказваць добрыя вынікі. — Заўв. рэд.) у іншых рэгіёнах, але на Віцебшчыне не атрымліваецца. Ён адзначыў, што, калі большая частка палёў у добрым стане, то, значыць, і астатнія таксама можна да такога стану прывесці. Пытанне ў тым, што дзесьці не хапае дысцыпліны, персанальнай адказнасці кадраў, дзесьці безадказна ставяцца да выканання пастаўленых задач і тэрмінаў, якія вызначыў Кіраўнік дзяржавы. У рамках нарады былі пастаўлены канкрэтныя задачы, замацаваны адказныя асобы, зацверджаны тэрміны. І я думаю, што ўжо да лістапада мы павінны ўбачыць, што нашы чыноўнікі трымаюць справаздачу. Прычым гэта датычыцца ўсёй «вертыкалі».
Рэзюмуючы тэму, госць праграмы падкрэсліў, што ўсе павінны працаваць на сваіх месцах з максімальнай аддачай:
— Кожны з нас павінен разумець, што сёння мы не маем права расслабляцца, таму што сітуацыя сапраўды складаная. Мы бачым, што робіцца каля нашых меж. І, адпаведна, для таго каб быць канкурэнтнымі на знешніх рынках і падтрымліваць сацыяльна-палітычную стабільнасць, мы павінны быць вельмі эфектыўнымі. Неабходна быць больш эфектыўнымі за нашых канкурэнтаў.
«Лепш працаваць, чым ваяваць»
Намеснік старшыні Пастаяннай камісіі Палаты прадстаўнікоў па аграрнай палітыцы Андрэй Балыш выказаў упэўненасць, што вострыя, але абсалютна справядлівыя словы Кіраўніка дзяржавы павінны стаць падставай для разважанняў і асновай для рэальных перамен:
— Прэзідэнт не проста канстатаваў факты, а пазначыў запыт ад народа і найвышэйшы ўзровень адказнасці, які ляжыць на кожным з нас. Асабліва гэта датычыцца аграпрамысловага комплексу.
Дэпутат адзначае, што ў бягучую пяцігодку АПК вобласці ўвайшло, маючы не толькі фінансавыя і тэхнічныя праблемы, але і ўстойлівую дынаміку скарачэння працоўных на вёсцы:
— Аляксандр Рыгоравіч акцэнтаваў увагу на простым, але фундаментальным прынцыпе: «Лепш працаваць, чым ваяваць». Развітая, моцная эканоміка — гэта аснова суверэнітэту і стабільнасці. Віцебская вобласць, з’яўляючыся пятай часткай краіны, не можа быць яе слабым звяном. Дакор у тым, што пазітыўны вопыт перадавых гаспадарак не тыражуецца, абсалютна дакладны. Асноўная мэта сёння — прытрымлівацца механізмаў, якія стабільна працуюць, каб найлепшыя практыкі ў галіне якасці ўзворвання, жывёлагадоўлі, раслінаводства, перапрацоўкі станавіліся абавязковай нормай для ўсіх. Першасная задача дайсці да кожнага сельгаспрадпрыемства, забяспечыць іх эфектыўную работу, а таксама бачыць перспектыву іх далейшага развіцця.
І яшчэ адзін важны пасыл Кіраўніка дзяржавы, на які звяртае ўвагу парламентарый: «Мы за гэту зямлю адказваем»:
— Гэта прамы заклік да дзеяння для ўсіх. Словы Прэзідэнта аб трагічнай сітуацыі ва Украіне — суровае папярэджанне аб тым, да чаго вядуць безадказнасць і раз’яднанасць. Мы не маем права падобнага дапусціць. Упэўнены, што нават пры ўсіх наяўных праблемах, Віцебская вобласць валодае патэнцыялам для паспяховага развіцця АПК і пра гэта сведчаць станоўчыя вынікі па асобных кірунках галіны.
Намеснік старшыні Пастаяннай камісіі Палаты прадстаўнікоў па бюджэце і фінансах Аляксандра Міхеенка таксама салідарная з тэзісам Кіраўніка дзяржавы «Лепш працаваць, чым ваяваць»:
— Я цалкам падтрымліваю, сказанае Прэзідэнтам. Мы 80 гадоў жывём у мірнай краіне, пад спакойным небам, мы не прывучаны ваяваць, таму трэба працаваць! Важна, каб гэты пасыл пачулі людзі, простыя работнікі, сёння гэта залежыць ад кожнага. І калі ў цэлым гаварыць аб аграпрамысловым комплексе, то, не ўнікаючы глыбока ў тэхналогію вытворчасці, праязджаючы ўздоўж палёў, адразу відаць, як добрасумленна там папрацаваў механізатар, як якасна ўзарана глеба і праведзена апрацоўка — гэта ўсё складнікі поспеху. І дакладна так на кожнай ферме: там, дзе цялятніца ставіцца да жывёл з душой, там і не будзе падзяжу, а будзе парадак. Ёсць прыклад, дзе дзве фермы стаяць побач, на адной — жывёла гіне, а на суседняй — за кожным цяляткам як за дзіцем догляд і клопат, а падзяжу там няма! Гэта сведчыць аб асабістым стаўленні кожнага чалавека. І так на любой працы.
Суразмоўніца падкрэслівае: кіраўнікі гаспадарак павінны быць наперадзе і задаваць тон.
— Патэнцыял сёння ёсць не толькі ў Віцебскай вобласці, а, безумоўна, ва ўсёй краіне, — выказала ўпэўненасць парламентарый. — Работнікам трэба перагледзець свае падыходы, і яны гэта павінны пачуць! А як сказаў Прэзідэнт, што мы не зможам ваяваць, гэта сапраўды так і ёсць. Мы гэтага не ўмеем рабіць, таму што наш беларускі народ спакон веку жыў, каб ствараць. Мы павінны рабіць тое, што ўмеем, — працаваць. Такая задача стаіць перад усімі галінамі народнай гаспадаркі, і ў краіне сёння ўсё для гэтага ёсць. І Прэзідэнтам, і ўрадам прымаюцца ўсе неабходныя меры для развіцця вытворчасці, развіваецца неабходная інфраструктура і шмат іншага. За людзьмі на месцах застаецца толькі якасна выконваць працу, любіць сваю зямлю, каб ёй ганарыліся і нашы дзеці, і нашы ўнукі, і ўсе наступныя пакаленні.
Брацца за справу па-сапраўднаму
Уся работа па ліквідацыі недахопаў у эканоміцы паўночна-ўсходняга рэгіёна цалкам яшчэ наперадзе, звяртае ўвагу намеснік старшыні Пастаяннай камісіі Палаты прадстаўнікоў па міжнародных справах Алег Дзячэнка:
— Неабходна сістэматычна, цярпліва і настойліва працаваць па кожным кірунку, няхай гэта будзе жывёлагадоўля, раслінаводства, лясная гаспадарка, перапрацоўка сельскагаспадарчай прадукцыі, прамысловая вытворчасць і іншыя галіны, ад якіх напрамую залежыць устойлівае развіццё Віцебскай вобласці.
Парламентарый канстатуе, што дакладнае выкананне працоўнай, выканаўчай і тэхналагічнай дысцыпліны, павышэнне ўзроўню адказнасці за даручаную справу — гэта і ёсць правільны, сур’ёзны і эфектыўны метад вырашэння пастаўленых задач:
— Ва ўсякім выпадку, асноўны змест работы ў гэтым кірунку на найбліжэйшы перыяд вызначаны Прэзідэнтам Беларусі. Таму трэба закасаць рукавы і брацца за справу па-сапраўднаму, як таго патрабуе вельмі напружаная абстаноўка ў краіне і ў свеце, абумоўленая новымі выклікамі, звязанымі са знешнімі пагрозамі і нарастаючай ваеннай небяспекай. На гэты конт падзеі, якія развіваюцца на ўсходзе еўрапейскага кантынента, не пакідаюць і ценю сумнення.
Выказаўся парламентарый і аб прыцягненні працоўных мігрантаў:
— Аб’ектыўны ход падзей разбурае існуючую міфалогію вакол гэтага пытання. Калі спачатку сярод нязначнай часткі нашага грамадства паднялася хваля страхаў і алармісцкіх настрояў, то з цягам часу яна пайшла на спад і згасла наогул. Да насельніцтва прыйшло ўсведамленне таго, што без замежных працоўных рэсурсаў складана пераадолець цяжкасці ў айчыннай сельскай гаспадарцы і жывёлагадоўлі, асабліва ў тых рэгіёнах, адкуль у сілу розных прычын выехалі нашы людзі працаздольнага ўзросту, стаўшы ўнутранымі мігрантамі ў райцэнтрах, абласных гарадах і ў сталіцы.
Ён звярнуў увагу на сусветную практыку, якая паказвае, што жорстка кантраляваная ўрадам і работадаўцамі знешняя працоўная міграцыя спрыяе ажыўленню ўсёй эканамічнай дзейнасці.
— Ды і невялікі пакуль айчынны вопыт выкарыстання замежных рабочых рук сведчыць пра гэта. Так, летам у сваёй выбарчай акрузе ў Глускім раёне Магілёўскай вобласці я азнаёміўся з умовамі працоўнай дзейнасці мігрантаў з Узбекістана, занятых у дрэваапрацоўчай прамысловасці. Замежнікам забяспечаны годны заробак і камфортны побыт. Планавыя заданні выконваюцца, паступаюць падаткі, праблем з мясцовым насельніцтвам у прыезджых няма. Усе задаволеныя, — падкрэсліў суразмоўца.
У завяршэнне ён выказаў упэўненасць, што меры, якія прымаюцца на ўсіх узроўнях, прывядуць да выпраўлення арганізацыйна-гаспадарчай сітуацыі ў аграпрамысловым комплексе, жывёлагадоўлі, прамысловасці і будуць спрыяць абуджэнню і развіццю ініцыятывы і зацікаўленасці кіраўнікоў арганізацый і прадпрыемстваў у атрыманні канкрэтных вынікаў, за якія не будзе сорамна ні перад людзьмі, ні перад Кіраўніком нашай дзяржавы.
