Мінскі аўтамабільны завод распрацоўвае пасажырскі беспілотны шатл для аэрапортаў з ужываннем 3D-друку. Пра гэта расказаў дырэктар навукова-тэхнічнага цэнтра — галоўны канструктар ААТ «МАЗ» Андрэй Саўчыц на круглым стале «Развіццё адытыўных тэхналогій у Рэспубліцы Беларусь» у рамках міжнародных спецыялізаваных выстаў у Футбольным манежы ў Мінску, паведаміла БелТА.
На Мінскім аўтамабільным заводзе ёсць буйнафарматны 3D-прынтар з памерам працоўнага поля 4×1,5×1,7 м. «Традыцыйнымі спосабамі стварэнне ўзораў займае, як правіла, да трох гадоў: мы праектуем і вырабляем дэталі. Гэты працэс досыць працяглы, таму што вельмі шмат часу ідзе менавіта на выраб аснасткі. Наша тэхніка — буйнагабарытная, дэталі велізарныя, і аснастка пад іх таксама габарытная. На прыкладзе сучасных узораў тэхнікі мы імкнёмся істотна скараціць гэтыя тэрміны, дасягаючы 6-месячнага цыклу: пачынаем праектаваць і праз паўгода ўжо можам дэманстраваць гатовы ўзор», — растлумачыў Андрэй Саўчыц.
Адзін з найбольш значных прыкладаў прымянення тэхналогіі і буйнафарматнага прынтара — пасажырскі беспілотны шатл для аэрапортаў, які цяпер распрацоўваецца прадпрыемствам, і ў якім наогул не прадугледжана працоўнае месца кіроўцы. «Выкарыстоўваць традыцыйныя тэхналогіі для такой задачы — складаная і затратная справа. З ужываннем 3D-друку мы на этапе, калі дызайнеры ўжо папрацавалі, праектуем саму канструкцыю і адпрацоўваем пытанні трываласці. Мы імкнёмся стварыць маналітную канструкцыю, якая друкуецца за адзін раз (ці за два, як дазволіць канструкцыя). Сядзенні, элементы інтэр’еру — усё гэта будзе адразу закладзена ў канструкцыю. За кошт гэтага мы плануем забяспечыць неабходную трываласць для бяспекі пасажыраў і апорную здольнасць самога транспартнага сродку», — расказаў галоўны канструктар.
Пакуль ёсць невялікія складанасці з разлікамі трываласці: традыцыйныя сродкі трохмернага праектавання добра разлічваюць металічныя элементы, а вось разнастайнасць пластыкавых матэрыялаў — гэта новая вобласць. «Мы праводзілі выпрабаванні элементаў канструкцыі, і вынікі блізкія да разліковых, але маштабнага вопыту яшчэ не было», — сказаў ён.
У пасажырскай тэхніцы МАЗ звычайна выкарыстоўвае стандартныя профілі. «Калі ж канструкцыйным пластыкам не ўдаецца забяспечыць патрабаваную трываласць, заўсёды можна прадугледзець металічныя закладныя: пакінуць поласці і на этапе друку ўстанавіць у іх дадатковыя металічныя элементы», — звярнуў увагу Андрэй Саўчыц.
