Суд Брэсцкага раёна абвясціў прысуд па крымінальнай справе аб ДТЗ, у якім пацярпелі жанчына і яе трое маленькіх дзяцей. Пра гэта паведаміла БелТА са спасылкай на прэс-службу Брэсцкага абласнога суда.
На лаве падсудных апынуўся 54-гадовы мужчына. У ліпені 2024 года ён кіраваў грэйдарам. Пры выездзе на скрыжаванне праявіў няўважлівасць і неасцярожнасць, не прадаставіў перавагу аўтамабілю Mercedes-Benz Sprinter 316, які ехаў па галоўнай дарозе, з-за чаго адбылося сутыкненне. Ад удару мікрааўтобус з’ехаў у кювет і перакуліўся. У ДТЗ пацярпелі чатыры пасажыры Mercedes.
Кіроўца грэйдара сваю віну прызнаў і чыстасардэчна раскаяўся. Паводле яго, ён позна заўважыў мікрааўтобус, які набліжаўся, таму не паспеў спыніцца. Пасля сутыкнення ён дапамагаў дастаць пацярпелых з пашкоджанай машыны.
Суд прызнаў мужчыну вінаватым паводле ч. 2 арт. 317 КК. Яму прызначана пакаранне ў выглядзе чатырох гадоў абмежавання волі з накіраваннем у папраўчую ўстанову адкрытага тыпу. Таксама яго на пяць гадоў пазбавілі права займацца дзейнасцю, звязанай з кіраваннем транспартнымі сродкамі.
Прысуд не ўступіў у законную сілу. Ён можа быць абскарджаны і апратэставаны ва ўстаноўленым законам парадку.
