У складзе расійскай дэлегацыі — кіраўнік рэспублікі Мардовія Арцём Здунаў. Мэта візіту — правядзенне перагавораў, накіраваных на развіццё супрацоўніцтва. «Мы ў Беларусі ўпершыню. Нашы продкі абаранялі адзіную краіну, і мы застаёмся брацкімі рэспублікамі. Саранск — „сталіца святла“ ў Савецкім Саюзе — і цяпер трымае гэту марку, займаючыся ўсім, што звязана з крыніцамі святла. Такія ж прадпрыемствы ёсць у Брэсцкай вобласці. Гэта адзін з напрамкаў, на якім мы дакладна зробім вялікі акцэнт, каб разам вырабляць і прадаваць. Рынак даволі вялікі вакол, у Садружнасці можна шмат цікавага зрабіць», — адзначыў Арцём Здунаў.

Бакі бачаць шмат агульнага для ўзаемадзеяння таксама ў гуманітарнай сферы. «Другі напрамак — работа з моладдзю. У вас яна пастаўлена на самым высокім узроўні. Дамовіліся, што нашы дзеці абавязкова павінны сюды прыехаць у ваенна-патрыятычны лагер (у Рэспубліканскі цэнтр патрыятычнага выхавання моладзі. — Заўвага БЕЛТА). Але мы і нашы тэхналогіі пакажам», — дадаў кіраўнік рэспублікі Мардовія. 

На тэрыторыі Беларусі ў гады Вялікай Айчыннай вайны ваяваў дзед Арцёма Здунава. Брэсцкая крэпасць на кіраўніка Рэспублікі Мардовія зрабіла глыбокае ўражанне. «Сэрца б’ецца часцей, таму што мы выраслі на апавяданнях патрыятычных. Тут жа і з Мардовіі героі ёсць (якія абаранялі Брэсцкую крэпасць. — Заўвага БЕЛТА), біліся да канца і пахаваны. Вядома, сакральнае месца. Уражанне поўнае пра яе можна скласці толькі пасля наведвання. Буду ўсім рэкамендаваць абавязкова наведаць Брэсцкую крэпасць», — падкрэсліў ён. 

Расійскія госці азнаёміліся з умовамі ў Рэспубліканскім цэнтры патрыятычнага выхавання моладзі. У мемарыяльным комплексе «Брэсцкая крэпасць-герой» усклалі кветкі і ўшанавалі памяць абаронцаў Айчыны мінутай маўчання. 

«Мы адкрыты не проста для дыялогу, а для плённага супрацоўніцтва ў любых напрамках (культурных, адукацыйных, эканамічных, у прамкааперацыі) з усімі рэгіёнамі Расійскай Федэрацыі. Нам вельмі імпануе, што хоць кіраўнік Рэспублікі Мардовія і ўпершыню ў Брэсцкай вобласці, але ўжо знойдзена разуменне з калегамі па многіх пытаннях», — звярнуў увагу намеснік старшыні Брэсцкага аблвыканкама Віктар Рафаловіч.

Арцём Здунаў запрасіў дэлегацыю Брэсцкай вобласці наведаць з візітам у адказ Мардовію.