Удзельнікі пасяджэння разгледзелі справаздачы аб рэалізацыі дзяржпраграм «Малое і сярэдняе прадпрымальніцтва», «Навукаёмістыя тэхналогіі і тэхніка», «Навукова-інавацыйная дзейнасць НАН Беларусі», «Уладкаванне ваенных гарадкоў», «Фізічная культура і спорт» на 2021—2025 гады. У пасяджэнні камісіі прынялі ўдзел прадстаўнікі Мінэканомікі, Мінабароны, Мінспорту, НАН Беларусі, аблвыканкамаў і Мінгарвыканкама.

Гаворачы аб выніковасці дзяржпраграмы «Малое і сярэдняе прадпрымальніцтва», адказным заказчыкам якой з’яўляецца Міністэрства эканомікі, Юрый Чабатар адзначыў значныя колькасныя і якасныя змены ў сектары МСП. «Малы і сярэдні бізнес сёння фарміруе звыш 30 % валавой дабаўленай вартасці, пятую частку прамысловай вытворчасці, каля 43 % экспарту тавараў і амаль 60 % экспарту паслуг, больш за трэць працоўных месцаў. Прыкметна змянілася і структура сектара МСП: калі раней малы бізнес у асноўным асацыяваўся з гандлем, то цяпер фокус зрушыўся на стварэнне дабаўленай вартасці ў такіх сферах, як будаўніцтва, транспарт, вытворчасць новых відаў прадукцыі», — пазначыў ён.

Такой трансфармацыі спрыяла ў тым ліку спрашчэнне доступу да дзяржаўнай фінансавай падтрымкі. «За пяць гадоў яе сукупны аб’ём дасягнуў амаль 65 млрд рублёў. На камфортных умовах фінансаванне атрымалі звыш 6 тыс. бізнес-ідэй, прычым прыярытэт аддаваўся імпартазамяшчальным і экспартна арыентаваным праектам. Дасягнутыя вынікі пацвярджаюць эфектыўнасць выбраных мер і дэманструюць, што малы і сярэдні бізнес становіцца адным з драйвераў эканамічнага росту краіны», — адзначыў міністр.