Кожны макет мае вышыню 7 м і шырыню 4 м. Агульная кампазіцыя падзелена на фрагменты па лініях аконных праёмаў і кожны вывешаны ў асобнай рамцы. Як заявіла сама мастачка, словы якой прыводзіць прэс-служба Гран-Пале, яна старалася выкарыстоўваць «збалансаваную, але яркую колеравую гаму», аналагічную той, што была ў арыгінальных вітражах архітэктара Эжэна Віёле-ле-Дзюка, які рэстаўраваў сабор у сярэдзіне XIX стагоддзя. 

Сюжэты, намаляваныя на макетах, натхнёныя хрысціянскім святам Пяцідзясятніцы (у праваслаўнай традыцыі — Дзень Святой Тройцы). На адным з макетаў намаляваныя людзі, што ўзносяць малітвы, на іншых — навальнічнае неба і дрэва, што сагнулася ад ветру, як у адным з сюжэтаў «Дзеянняў святых апосталаў». На астатніх вітражах намаляваныя Дзева Марыя, якая стаіць у натоўпе з узнесенымі да неба рукамі, а таксама сыходжанне Святога Духа і працэсія ўвераваных на чале з групай дзяцей. 

Выстаўляючы свае працы ў Гран-Пале, мастачка хацела даць агульнае ўяўленне пра тое, як будуць выглядаць будучыя вітражы. Зараз яны знаходзяцца ў працэсе вырабу шкловыдзімальным атэлье, іх завяршэнне і ўстаноўка на паўднёвым фасадзе сабора плануецца ў снежні 2026 года. Працы Табурэ складуць 5 % ад усёй плошчы 120 вітражоў сабора, якія ствараліся з XII па XX стагоддзе. 

Найбуйнейшы пажар у Саборы Парыжскай Божай Маці адбыўся 15 красавіка 2019 года. Тады абрынуўся шпіль, полымем была ахоплена апорная канструкцыя. Пажар знішчыў унікальны драўляны каркас даху з васьмісотгадовых дубовых бэлек. Аднак рэліквіі ацалелі. Прэзідэнт Францыі Эмануэль Макрон распарадзіўся адрэстаўраваць сабор цягам пяці гадоў. 7 снежня 2024 года адбылася цырымонія ўрачыстага адкрыцця сабора пасля рэстаўрацыі. Для наведвальнікаў ён зноў адчыніў дзверы 8 снежня. Поўнае заканчэнне рэстаўрацыі запланавана на 2029—2030 гады. Агульныя выдаткі на аднаўленне галоўнага храма Парыжа папярэдне ацэньваюцца ў 850 млн еўра.