Аляксандр Невяроўскі падрабязна спыніўся на выніках другога пасяджэння VII Усебеларускага народнага сходу, якое прайшло ў снежні 2025 года, падчас якога Прэзідэнт Беларусі Аляксандр Лукашэнка звярнуўся з Пасланнем да беларускага народа і Нацыянальнага сходу, а таксама была зацверджана Праграма сацыяльна-эканамічнага развіцця на 2026-2030 гады. «У праграме вызначаны сем прыярытэтаў на бліжэйшую пяцігодку, адзін з якіх — умацаванне абараназдольнасці, — адзначыў Аляксандр Невяроўскі. — Усё заканамерна. Без бяспекі не можа быць моцнай эканомікі і сацыяльнай сферы».

Намеснік дзяржсакратара Савета Бяспекі нагадаў, што ў дакуменце адлюстраваны два індыкатары, дасягненне якіх дасць магчымасць павысіць абараназдольнасць. Першы — доля айчынных узораў узбраення, ваеннай і спецыяльнай тэхнікі ў агульным аб’ёме дзяржаўнага абароннага заказу. У дакуменце прадугледжана яго павелічэнне да 50 % і больш. Другі індыкатар — рост інвестыцый у вытворчасць узбраення, ваеннай і спецыяльнай тэхнікі, які павінен быць не менш за 130 %.

«Уключэнне ў праграму сацэканамразвіцця пытанняў умацавання абараназдольнасці краіны ў якасці асобнага раздзела — важная навацыя, — падкрэсліў Аляксандр Невяроўскі. — Яна прадыктавана патрабаваннямі часу. Паглядзіце, што адбываецца каля нашых граніц. Пад маркай міфічнай „пагрозы з усходу“ заходнія суседзі праводзяць актыўную мілітарызацыю, бяздумна павялічваюць свае ваенныя выдаткі. Зразумела, мы не можам абыякава назіраць за тым, што адбываецца. Так, мы катэгарычна супраць любой гонкі ўзбраенняў. Але пры гэтым мы актыўна мадэрнізуем сваё войска, і робім гэта без шкоды для нацыянальнай эканомікі».

Паводле яго слоў, вялікая ўвага ў цяперашнім складаным становішчы надаецца таксама ахове Дзяржаўнай граніцы Беларусі. Толькі ў 2025 годзе ўведзены ў эксплуатацыю 5 новых пагранічных застаў. Беларускія вартавыя граніцы аснашчаюцца сучаснай тэхнікай і ўзбраеннем, заўважыў Аляксандр Невяроўскі.

Літаральна на днях Прэзідэнт зацвердзіў рашэнні на ахову Дзяржаўнай граніцы ў 2026 годзе, вызначыў прыярытэты і задачы для органаў пагранічнай службы. «Рашэнні прымаюцца па двух напрамках: па лініі пагранічнай службы — наземная граніца і паветраная ахова з улікам геапалітычных асаблівасцяў. У 2025 годзе мы ўбачылі пэўныя выклікі, таму адбыліся змены ў ахове паветранага эшалона рэспубліканскай граніцы. З улікам рызык, асабліва на паўднёвым напрамку, Прэзідэнт акцэнтаваў увагу пагранічнікаў на гэтых момантах, каб не дапусціць эскалацыі на нашай граніцы», — адзначыў у гутарцы з журналістамі намеснік дзяржсакратара Савета Бяспекі.

Ён дадаў, што па даручэнні Кіраўніка дзяржавы Дзяржаўны сакратарыят Савета Бяспекі сістэмна праводзіць выязныя праверкі ўсіх воінскіх фарміраванняў у Беларусі. «Гэта дапамагае з боку ўбачыць недахопы, устараніць іх і трымаць усё ў баявой гатоўнасці», — сказаў на заканчэнне Аляксандр Невяроўскі.