Падчас знаходжання кіраўніка дзяржавы ў гэтай краіне запланаваны перагаворы з Султанам Амана Хайсамам бен Тарэкам Аль Саідам.

Узаемадзеянне дзвюх краін апошнім часам значна актывізавалася, у тым ліку дзякуючы абмену візітамі, які адбыўся раней. Перспектыўныя напрамкі супрацоўніцтва, якія былі вызначаны ў ходзе візіту Аляксандра Лукашэнкі ў Маскат у 2024 годзе, атрымалі развіццё і ляглі ў аснову паўнавартаснай дарожнай карты, падпісанай у Мінску падчас візіту Султана Амана ў кастрычніку 2025 года. 

Цяперашні візіт Прэзідэнта Беларусі ў Аман дасць магчымасць прадметна абмеркаваць практычныя крокі ў развіццё раней дасягнутых дамоўленасцей і рэалізацыі сумесных праектаў у розных сферах. 

З прыбыццём у Аман працягваецца шматдзённая замежная камандзіроўка кіраўніка беларускай дзяржавы, геаграфія якой ахоплівае краіны Цэнтральнай і Паўднёва-Усходняй Азіі, Блізкага Усходу і Паўночнай Афрыкі. Аляксандр Лукашэнка раней прыняў удзел у саміце АДКБ у Кыргызстане і наведаў М’янму з першым у гісторыі двухбаковых адносін афіцыйным візітам. Далей у планах беларускага лідара — першы візіт на вышэйшым узроўні ў Алжыр, а таксама наведванне Аб’яднаных Арабскіх Эміратаў.